【维港会】Ann姐教大家蒸口罩消毒重用 何栢良:害死人

全城「一罩难求」，政府既然帮唔到手解决口罩荒，市民只好自求多福。民建联议员蒋丽芸(Ann姐)可能见大家四出扑口罩咁辛苦，于是醒大家一招，教家消毒口罩重用，如果你信，日后口罩可以无限重用，唔使惊唔够口罩用啦！不过，港大感染及传染病中心总监何栢良接受传媒查询指影片错得离諎、害死人，强调外科口罩应用完即弃，重申「五『戴』要求。缺一不可！」

Ann姐喺facebook分享一段影片，片中「专家」介绍高温蒸口罩十分钟后，就可消毒重用。Ann姐呢个po短短两个钟，就吸咗近万个「哈哈」同「嬲嬲」，逾7000个分享。识睇梗系睇留言，有网民就赞「孔子医学奖非佢莫属」、「呢排兴气炸锅，试下气炸啦，健康啲」、「建议Ann姐身先士卒，长期用二手口罩」。

正当群情汹涌之际，Ann姐再出一个po回应，指好多市民买不到口罩表示担忧，有关短片是「没办法之中的办法，总比不戴口罩上街好」。佢仲话，最理想是政府尽快解决口罩荒问题。