【头条独家】晚饭时间帮衬便利店 陈家乐买蕉医肚

33岁嘅陈家乐呢排好多戏上，贺岁档已经有两套，分别系《紧急救援》同《我的笋盘男友》，所以呢期佢好忙，忙做访问宣传，所以娱乐版成日都见到佢。日前晚上六点，全身黑包到实嘅陈家乐揸车去咗铜锣湾一间便利店买嘢食，晚饭时间唔坐定定食，佢选择买三文治加宝矿力加两条蕉做晚餐，真系忙到咁咩?采访:梁志明

陈家乐03年参加新秀，入过十六强，直至06年签约英皇先正式入行。自18年同余香凝分手后，男方以事业为先，戏接戏相当忙，更凭TVB剧《逆缘》中的「冷冻爷爷」入晒屋，极速吸入大量粉丝，当事人表示相当惊讶。

五分钟无咗320蚊
上新闻搜寻网Wise Search打陈家乐三个字有好多资料，除当事人有两部戏上外，佢同关智斌及杨天宇主持嘅网上节目《三夫当关》又有新闻稿，连陈滢嘅访问都会提到佢个名。日前晚上六点，由帽到衫到裤到背囊都黑色嘅陈家乐揸车去到铜锣湾时代广场附近，戴住口罩嘅佢落车后就急急行去便利店，见佢望咗一阵，拣咗一件三文治同一支宝矿力，临去埋单再买多两条蕉，然后快步行返上车，由买到行上车都唔使五分钟，但佢临上车前好似拎住张纸，疑似违例泊车罚款单，如果为咗买三文治而无咗320蚊，咁就真系好唔抵嘞。