【头条独家】阿妈挂住食同玩电话 刘晓彤囡囡闷到托晒头

前无綫艺人刘晓彤（Bell）自04年结婚后，便退出做「全职妈咪」专心凑仔女，曾扬言不是少奶奶的她一直都亲力亲为照顾家庭，仲养到三个小朋友又乖又黐身。不过，早前见她带埋囡囡跟朋友饭聚，Bell不是做「低头族」，就是低头密密扒饭，闷到阿女托晒头兼翻白眼！采访：梁志明

刘晓彤下嫁从事鞋业严姓商人后，便淡出幕前专心相夫教子，即使贵为少奶奶，照顾三个仔女都绝不假手于人，经常凑住啲小朋友周围去，好似日前傍晚6点几，Bell就带住囡囡现身铜锣湾闹市。经常话啲后生仔女净系识得玩电话，估唔到50岁的Bell都一样系「低头族」！话说，当日孭住个背囊、一抽二褦的她，站在街头一路挂住睇手机，未知是忙住覆Message，抑或开App觅食呢？搞到在旁被冷落的囡囡嘟晒嘴，惟有挨住妈咪撒吓娇啦，点知妈咪都系零反应，阿女即刻翻晒白眼冇晒符！

跟阿妈去聚会好闷
见交通灯一转，Bell立刻拖实囡囡过马路，之后两母女在附近的翡翠明珠广场，搵了一间日本餐厅坐低医肚。Bell拎住本Menu「O晒嘴」，应该都是花多眼乱，结果她终于望一望个女求救，不过囡囡就专注队支柠檬茶，阿妈惟有自己发办啦，队到一半，囡囡都好孝顺咁递支茶畀妈咪饮，可惜对方唔领情。其后一班长辈、好友陆续抵达，见Auntie和Uncle一坐低，囡囡即笑晒口转攻跟他们玩，其间又举起盒玩具Show畀大家睇，而坐在侧边的Bell继续睬你都傻，耷低头大啖食。不过冇耐一班大人开始自己倾，搞到囡囡好冇瘾双手托腮，连可爱的笑容都收番埋！