【头条独家】 环球Fab Four半数冇得留低 陈凯咏认各行各路好正常
2019-12-02 19:38 
今年环球唱片打造了《Fabulous Four》，同日推出四组新人单位，包括乐队Dusty Bottle、ONE PROMISE、Jace Chan(陈凯咏)及Oscar Tao(涂毓麟)，为乐坛注入新力量。跑到年尾，竟然得返Dusty Bottle及陈凯咏Keep住派到第三首新歌，而ONE PROMISE和涂毓麟冇咗影，Dusty Bottle否认踢走咗战友；陈凯咏就解释：「新人梗系会走埋一齐，之后各行各路好正常，好难步伐永远一致嘅。」采访：方骞平 场地：Mr. Crab by The Captain's House
最近陈凯咏第三首新歌《讲》属于孤独情歌，Jace唱出伴侣口口声声话钖你，其实伤害你最多的绝望心痛、坦言有小小自己写照；至于五人组合Dusty Bottle的新歌叫《What Did You Say》，主音Kerryta话首歌较dark，歌词讲社会问题，因为社会有好多框框，要停留喺框框入面定系跳出嚟？畀大家反思空间。对于呢个round冇咗两个亲密战友，陈凯咏坦言Fab Four人数减半变得孤单及冷清，而且压力大咗，大家一齐出歌会开心好多，但都明白嘅：「好难永远都系同步嘅，但我哋四组会互相关注对方作品，留得低系硬嘢，今年出到三首歌经已好幸运，都唔敢谂太多，但开心公司畀我做自己锺意做嘅创作。年尾要行毕业礼喇，因为过埋今年唔再系新人，要成长喇！」
人人都有录新歌
另Dusty Bottle主音Kerryta否认踢走ONE PROMISE及公子Oscar：「佢哋都有keep住做歌，只系我哋好彩做得比较快，公司畀我哋出先。」Jeff还爆战友已有安排：「佢哋经已录紧下年嘅歌，同埋明年会出大碟，完全唔系被踢走。」Dusty Bottle笑言他们都有策略性，就系加入性感靓女主音Kerryta后多咗唔少男fans，Kay仲留意到MV入面Kerryta夹晒脚卧牀，好吸引。
最新回应