【头条独家】压力爆标 拍《失踪》狂嗌丧跑歇斯底里 阿娇自爆发晒脾落老公身上
2019-11-08 21:08 
阿娇锺欣潼去年正式嫁畀台湾医生、「医界王阳明」赖弘国后，工作冇放慢脚步，婚后首部电影、跟凌文龙（小龙）首次合作的《失踪》亦快将推出。电影主题讲「结界」，戏中阿娇为搵失踪多年的父亲，经常要狂嗌、丧跑、歇斯底里，她同期仲要拍摄另一部电影，再加上要跟当时仍未注册的赖医生飞去英国拍摄内地真人骚《爸妈学前班》，阿娇自爆一度压力爆标抽离唔到，将脾气发晒喺老公身上。不过学小龙话斋，两人最终顺利结婚，证明阿娇当时冇吓怕赖医生，赖医生仲似乎好适应有个演员老婆添！撰文：杜淑霞 摄影：李维隆 发型：Amber Tse @ IL Colpo Central(阿娇)、Alva Lam(小龙) 化妆：Yan@Ndnco(阿娇)、Connie Lai(小龙) 服装：Polo Ralph Lauren(阿娇) 场地：香港九龙贝尔特酒店
电影以孔明的网络热爆小说《失踪》改编，虽然阿娇和小龙开拍前未睇过，但因故事吸引、加上监制伍健雄关系而接拍，而阿娇更坦承本身对真人真事特别感兴趣，「呢个故事系真人真事，自己一向都好锺意睇啲真人真事嘅电影，所以有机会都想拍。」
自揭患人群恐惧症
剧中阿娇饰演7年前父亲行山失踪、一直未有放弃寻父的社工「薛芷盈」，由于期间误入「结界」，所以当中有不少情绪失控的戏份，虽然阿娇自问不是容易受角色影响情绪的人，但由于同时间要拍电影《女子监狱》，又要拍内地真人骚《爸妈学前班》，搞到她终于忍唔住要爆啦！阿娇说：「嗰时我真系冇时间做番自己，拍真人骚嗰段日子我真系抽离唔到，将拍嘢嘅情绪，将个脾气发晒喺佢（老公）身上，仲要嗰时未结婚！」追问阿娇老公会否吓窒咗，见到呢一面？小龙即代答：「即系冇问题，都结咗婚！」阿娇更自爆跟老公拍完真人骚后互相更了解，「佢拍完就会明白，平日咁多镜头对住，做咩都有人影住系咩感觉，系会有几大压力！」阿娇又好多谢今次电影团队好多正能量，「我其实系有小小人群恐惧症，同埋唔知点同人相处，尤其系陌生人，今次大家不断鼓励大家，互相支持感觉好好。」
除了情绪，阿娇话这套戏需要体力一样大，因有不少丧跑戏，拍摄时仲自己行上山拍摄，「最初都担心㗎！我平时冇做运动，都惊抽筋、唔够力、呕咁样，所以有去啲行山用品铺买定啲能量食品同灯咁，后尾都冇拎过出嚟用，证明自己体力都OK。」讲到戏中的树林戏，小龙透露拍得特别辛苦，「除咗拍嘅时候啲工作人员要抬啲器材上去辛苦，最惨系拍拍吓，遇到台风山竹，好多树林冇咗，又惊嗰树易掉落嚟会有危险，结果搵咗好多公园。」阿娇补充：「有啲其实系空地嚟，真系好考佢哋功力。」
戏中阿娇和小龙虽然冇感情戏，只饰演邻居，但也有不少对手戏，小龙谓有机会集齐Twins好开心，「佢由细我睇到佢大呀！（阿娇：我哋一齐成长！）好开心好玩，之前舞台剧（《情敌劝退师》）同咗阿Sa（蔡卓妍），今次同埋阿娇，Yeah！齐咗Twins啦！」问阿娇会否想下次她跟小龙合演舞台剧，她想了想说：「真系好难，睇缘份，随缘啦！但如果演舞台剧首选同小龙合作。」问到两人下次想合演何种关系，小龙继续搞鬼：「keep住做邻居，可能我劈佢呀！」
最新回应