【头条独家】男仔头唔怕坏「女神」形象张曦雯：爱就爱我全部

2019-10-31 17:00

张曦雯（Kelly）最近出任11月3日于沙田马场举办的《莎莎妇女银袋日》的代言人，日前更为活动以女神look拍宣传片。Kelly早已被公认女神，在剧集《金宵大厦》及《解决师》角色一样离不开这框框，她坦承想将自己男仔头一面释放出来，仲话唔惊破坏粉丝心目中形象，更话：「佢哋爱就爱我全部！」宅男收到未！撰文：杜淑霞摄影：李维隆发型：Echo Wan@hair corner 化妆：Cac Leung 场地：跑马地马场

在《金宵大厦》和《解决师》中，Kelly前者演搞到林子善神晕颠倒的明星「Kelly」；后者则扮令王浩信难忘的前女友「Chloe」，共通点离不开女神啦！虽然Kelly唔厌做女神，但Keep住状态确系攰，「我平日唔使开工，都唔会整头发、唔化妆做番自己（唔怕破坏形象？）咁样就唔锺意，就唔系真爱啦！爱我就要爱我全部！同埋我素颜都应该OK嘅！」

自认唔浪漫
开工扮得靓多，Kelly连结婚都想从简，「朋友问过我将来结婚想点搞，我会想简单啲，成日工作都扮到靓一靓，日日都台庆咁款！」
讲到角色，她又自爆最近在新剧《木棘证人》中有突破，「有啲同韦家雄、罗仲谦几搞笑嘅情节，系大家未见过嘅一面。」她更想将男仔头性格在角色释放出来，「想完全改变大家对我形象，做啲大胆啲角色，唔系只有女神，可以演多啲唔同类型嘅角色，自己嘅戏路都可以濶啲。」
　　
讲到两个剧的对手林子善和王浩信，Kelly大赞好彩，大家都好夹得来，「我同子善太太一早识，合作起嚟更加亲切，佢教我演技外，仲教埋我健身，啱啱我买车整嘢都系问佢。」至于同浩信在澳洲墨尔本拍的浪漫戏份，Kelly直言唔想睇番，「拍嘅时候其实好冻，流住鼻涕咁咀点浪漫呀！同埋我系个唔浪漫嘅人，好怕睇自己演呢啲戏，会毛管戙！」