【头条独家】4岁Sofia身高似7岁 梁咏琪有长腿囡囡做高妹接班人

梁咏琪（Gigi）与西班牙籍老公Sergio嘅混血囡囡Sofia（祈淑菲）出世时已手长脚长，遗传晒父母嘅高瘦身材。早前，短发靓妈Gigi仲表示目测4岁乖女已有7岁高身形嘞！日前下午，Gigi与老公齐齐去中环接学跳芭蕾舞嘅囡囡放学，之后一家三口温馨去书店睇图书。见长腿囡囡身高已过妈咪条腰，睇怕快高长大嘅Sofia未入大学，好大机会高过妈咪啦！   采访 : 张咏森

高妹梁咏琪2011年与西班牙籍老公Sergio拉埋天窗，「筷子夫妇」嘅爱情结晶品喺15年2月尾诞生，混血千金Sofia自细手长脚长，今年初身高已超过一米。月前，Gigi一家三口齐齐做咗个基因检测，佢笑言对「成绩表」感满意，癌症及严重疾病数值正常，而测试结果发现爱女喺跳舞、唱歌及语言上最擅长，现实生活中Sofia的确好喜欢唱歌和跳舞。问女儿有无遗传其一双长腿？Gigi就大笑话：「我目测都有，囡囡得4岁但好似7岁小朋友咁高呀！」

陪睇故事书
日前下午4时许，本报记者喺中环太子大厦巧遇Gigi一家三口。见大眼Sofia愈大愈靓女，且身高已过父母条腰，唔怪得星妈Gigi曾话阿女18岁，可能有185cm高啦！当时高人夫妇正温柔陪爱女拣玩具，人夫拎住盒粉红色玩具畀囡囡睇；老婆就乌低身问小公主意见。其后，两母女再连体温馨拣图书，拣完就即场坐低一齐睇，见Gigi好有耐性向爱女讲故事，小朋友亦不时开心微笑，老公睇见心都甜。

其间，Sergio见两母女看得入神，即行去超市快手shopping。唔使十分钟，人夫折返会合爱妻，此时两公婆交换角色，Gigi着老公照顾小公主，然后独自往楼下商店买张贺卡。等Gigi行返书店join埋老公后，一家人手拖手落楼走人。