潮拜Kate Moss遗憾冇合照 邓丽欣自爆同王子拍拖压力大

邓丽欣（Stephy）继早前出席纽约时装周后，近日再获邀亮相巴黎时装周，其中她更获邀以香港区唯一艺人身份，跟全球逾200位时尚名人一同参加国际名模Kate Moss的派对，难怪Stephy兴奋称：「一直很期待见Kate Moss，觉得佢好型，可以目睹国际名模风采，真系好难得。见到佢真人后，跟想像中没有太大分别，觉得佢好有气质好吸引，只是遗憾未能合照！」
Stephy月初为出席纽约时装周前已刻意Keep Fit，今次见Kate Moss前可有「重施故技」？她表示：「最近好多人话我瘦咗好多，自己唔系太觉；今次冇刻意减肥，觉得依家身形OK。（最满意边个地方？）块面！依家唔会Baby Fat，其实最紧要都系块面，大家第一眼都系望块面，同埋冬天着多两件衫，身形系点都唔会觉。」

Stephy被指消瘦了，未知男友邱胜翊（王子）可会叫她增肥？Stephy闻言即甜丝丝表示：「唔会啦，我喺佢隔离好大压力，佢又瘦、皮肤又好。我反而有叫佢增肥，成日都叫佢食嘢，不过佢天生唔锺意食嘢，依家算系俾我感染咗食多了！」
不过，Stephy自爆初出道时曾因为Baby Fat身形感挫败，说：「初初出道做Model时，觉得上镜块面好肥，腰、身全部都好唔满意，于是进行地狱式减肥，跟Sammi（郑秀文）饮食餐单去减，嗰段时间食好少，同学放lunch大鱼大肉，我就食梳打饼加只蛋，后来发觉咁样落去唔得，个人会好攰同好唔开心，最终都系放弃咗。」