同Nowhere Boys拍MV 伊健教路唔化妆残样出镜先够凸出

乐队Nowhere Boys的主音Van获偶像郑伊健邀歌兼合唱新歌《时光岁月》，这歌原本由伊健独唱，但他听完Demo后提出合唱，「面粉」Van生日当天得知喜讯后开心到想喊。完成录音后，惊喜继续来，伊健爽快答应一齐拍MV。
拍摄当日，平时口水多过茶的Van面对伊健立即变乖宝宝，更被队友爆料「迫导演加戏」，Van立即解释：「其实剧本一早写好咗，我只系温馨提示导演有呢场戏啫！（听讲你噚晚敷Mask打孖上？）我梗系要整好啲个样，咁先至衬得起伊健！」伊健立即醒Van两招，说：「我初出道嗰阵出镜故意唔化妆，观众见到个个上镜都咁靓，宁宁舍舍有一个唔化妆黑麻麻残残地，咁先够特别！」每次埋位Van都异常紧张又姿整，遇上任何反光面都左照右照，在场工作人员为他鼓掌打气，伊健见状亲自为他试位和睇playback，Van好感动。

MV于校园取景，Nowhere Boys成员和伊健分别饰演教师和学生，鼓励年轻人勇敢追梦和珍惜友谊。Van说：「最初一心为写畀伊健独唱，旋律和歌词都度身订造，威逼利诱其他兄弟畀我完成梦想。后来伊健提议合唱，呢个消息系我今年最好嘅生日礼物。」身边的伊健说：「对我嚟讲都系好有意义嘅礼物。呢首歌由佢哋写音乐和填词，啲歌词好有趣，将我哋两代人连埋一齐。大家都知我咩年纪啦，虽然我哋嘅年纪有啲距离，但理想和理念可以一样，唔受年代或年纪限制，唔使分得咁清楚，音乐系可以一齐玩，我觉得呢首歌好适合一班人一齐唱。『梦想』就系呢首歌嘅理念。」