【维港会】袁弥昌辞政策顾问 叶刘轰无贡献：系我炒佢

修例风波令社会大撕裂，不少人因政见不同「反面」。其中新民党立法会议员容海恩的丈夫袁弥昌，近月多次高调撑示威者，同新民党主席叶刘淑仪唔多啱嘴型，原来袁弥昌本月初已辞去由叶太创立嘅汇贤智库政策顾问一职，强调系同叶太「和平分手」。

不过，叶太接受传媒访问时炮轰袁弥昌，批评对方无贡献「帮唔到手」，强调系「我炒佢」，仲叫袁弥昌「分手」唔好唱衰旧东家。袁弥昌在Facebook回应时，大赞叶太是好上司，「其实阿太平时对我哋好好嘅，系个好上司嚟，不过佢又真系好有性格，可能呢排心情唔好啫，唔好怪佢。」

袁弥昌在17年辞去民主思路总干事后，加入曾俊华的特首竞选团队，之后获叶刘淑仪青睐，邀加入新民党担任政策总裁，其后担任汇贤智库政策顾问。袁弥昌去年同叶太「爱将」容海恩结婚，叶太更大爆袁为追求容海恩才加入新民党，一对新人更请「媒人」叶太饮「新抱茶」，估唔到咁快闹翻，成为「磨心」嘅容海恩唔知点睇？佢话从来唔过问丈夫工作，亦未听过叶太就袁弥昌嘅工作向佢抱怨。