林子博太太患极罕见癌病激动落泪 忧老公压力爆煲

无綫娱乐新闻主播林子博与太太Shirley结婚16年，育有14岁女儿林咏渝与10岁儿子林卓楠，一家原本生活幸福，但Shirley于今年4月确诊患上罕见的「平滑肌肉瘤（腹腔）」，发现时已有扩散迹象，更进入第四期，只能接受化疗。
今期《东周刊》独家专访Shirley，她激动落泪说：「当知道有呢个病之后，我情绪非常之激动，而且好负面，老公喺我面前表现好正面，因为佢唔想我唔开心，但系我知道佢负担好大，我惊佢会有一日爆煲。而家我冇返工，又要成日睇医生，只系得佢一个人撑起头家，见到佢成个人落晒形，我乜嘢都帮唔到手，其实我自己都好唔开心。」
Shirley续说：「医生话呢个病一万人先有一个，药厂都唔会做呢啲咁少人用嘅药啦，所以我如果要食到真正有效嘅药，简直天文数字，我哋冇晒希望。上次去照肿瘤嘅面积，大咗好多。我起初做化疗嘅时候，二十四小时都全身痛楚，去唔到厕所，瞓唔到觉，食唔到嘢，条颈烂晒，足足捱咗七日，副作用系大到冇人相信到！」

子博今日凌晨则在fb留言：「自从公开太太患病后，近日收到有好多朋友以及本身唔相识嘅有心人，都透过唔同嘅渠道联络我。除咗打气激励嘅说话之外，有部分亦都分享咗唔少相关资讯俾我参考。感激！🙏🏻」他续谓：「好多人都话面对呢啲病，最重要系心态。其实未公开之前，一直以嚟太太都感到好无助！因为个案实属罕见，所以基本连搵同路人倾诉嘅机会都冇！但自从报道出街之后，已经有两位同路人（平滑肌肉瘤患者）主动联络我太太，分享自己嘅情况，令我太太感到不再孤单！所以喺度衷心感谢呢两位朋友主动联络分享，希望你哋早日康复，身体健康！」