细仔1岁生日孖老公肉紧啜爆 李蕴感触：唔舍得囝囝戒奶

自16年秘嫁大陆房地产商人罗章冠后，李蕴（Renee）已淡出娱乐圈，上月27日她刚度过28岁生日，已有一仔一女的她，不时在社交网页分享生活点滴，今日李蕴发长文，指儿子1岁生日，与老公及女儿齐齐庆祝，二人夹攻「啜爆」宝贝仔，场面温馨又搞笑！

李蕴撰长文，感触说：「8/8今日我个宝贝仔小新一岁啦！一年前今日你好乖，自己拣咗个好日子好时辰面世！妈妈只系剧痛咗三个钟就生咗你出黎！（生家姐痛12个钟）因为你系蚕豆仔加上全母乳，所以黄疸时间比较长！中间又见医生又抽血，妈妈见到你咁细只手仔比姑娘拮咁多次都好心痛！好彩到两个月完全退黄！」

她又说，「虽然系第二胎，好多嘢之前都同家姐经历过，但每个月见到你学识一啲新嘢我都仲系好似第一次做妈妈咁兴奋！虽然你一岁都仲系周围爬未识行（家姐一岁就自己行）但系你已经好叻仔，见你每日都有进步！牙牙学语！我哋全家人都会陪你慢慢成长！唔使急㗎！」

李蕴说：「我成日都话有家姐的弟弟像个宝！晞晞对细佬真系十分爱护有加同礼让！作为妈妈见到咁样，真系觉得前世可能做咗好多好事，今世生到一对咁乖咁可爱嘅宝贝，我好感恩！由于你系男仔，痴住妈妈嘅时间只系头几年，比起女仔，男仔会比较快独立同埋好快就会有自己圈子自己朋友，所以我好珍惜你而家痴我嗲我嘅每一刻！特别系喂奶嘅时候，相信系呢一世我同你关系最亲密最甜蜜嘅时候！仔～我已经唔舍得你戒奶唔舍得你长大！不过人总要向前看！」

「今日你一岁啦！妈妈祝你生日快乐身体健康！开心成长！爸爸妈妈会尽能力比你同家姐最好嘅成长环境同平等嘅爱！你乖乖哋同家姐继续融洽相处就得啦！I LOVE YOU SO MUCH我的前世情人！」