林俊贤旧爱Winnie认带林钰洧验DNA

（星岛日报报道）应届港姐冠军林钰洧（Denice）父母林俊贤及Jasmine最近因家暴、堕胎和验DNA等等前尘旧事而隔空互骂，Denice更声称父亲从没抚养过自己！本报联络到林俊贤的前女友Winnie，对于验DNA一事，Winnie直言当年是她的主意，而林俊贤独家回应了当年给Denice生活费的来龙去脉！
港姐冠军林钰洧（Denice）母亲Jasmine高调接受传媒访问，将家事公诸于世，Denice承认15岁曾被要求验DNA，更暗寸爸爸善忘。
爆有人失踪拒签纸离婚
林俊贤透过微信向本报澄清：「Denice在15、16岁，当我同佢见返面时，Winnie好似偷偷地拎咗Denice头发去验DNA，我本身冇理，系Winnie验完话俾我听，百分百系我个女，所以并唔系囡囡7岁时，我要求莫女士验DNA！」本报再向照顾Denice多年的Winnie查证，她在电话中直言：「验DNA确有其事，系我陪佢去验，因为她妈妈曾在林俊贤面前讲过『呢个女唔系你嘅!』所以唔好估估吓，直接去验DNA！」
Denice坚称父亲从来没抚养过自己，林俊贤指：「在Denice一岁半至到三岁，一直有俾生活费，佢咁细点会知道我有冇俾钱？可能佢妈咪冇话俾佢听，佢7岁时，我都全部清袋得返两千蚊，连屋都冇，直到后尾搵返钱，Winnie就建议帮我搵返个女，所以同Denice见返面后，我都有直接再畀钱佢！」
Winnie说：「看到Jasmine有关报道，我忍无可忍。我在97年经朋友介绍认识林俊贤。坦白讲，我感激林俊贤出现，是他将刚分手伤心欲绝的我带返去正常生活。他与前妻发生的事亦全部告诉我，我要为他澄清几点，林俊贤好想见返个女，可惜每次约好，跟着又有人话改期，每次都系问攞钱。有段时间，有人要深夜返工，叫林俊贤过去帮手睇住个女。98至99年间，林俊贤见完Jasmine同我讲：『佢终于肯签纸离婚，之后我哋可以结婚啦！』本来约好律师，点知又突然玩失踪，嗰次之后，我哋完全搵唔到Jasmine，所以到现时传媒只会称我是他的前女友。」
撑林俊贤性格不火爆
对于林俊贤被指控家暴，Winnie说：「我跟林俊贤生活五年，他从来没对我动过粗，推撞也没有，甚至大声讲嘢都好少。他的性格不火爆。我亦是意外怀孕，他从没叫我去堕胎，更加无叫我个仔去验DNA！佢当时赚钱唔多，但都要我入养和医院住头等，系我话唔好浪费住二等房就好！个仔出世后，佢会帮手喂奶，假日我哋会去酒店游水，出去玩，所以我唔相信佢会做出家暴的事！」
目睹独居生活感心痛
林俊贤结识Winnie后诞下一子，Winnie知道林俊贤想搵返个女，所以利用Facebook寻亲。Winnie说：「我唔想将来如果我有事，冇人话到俾仔仔听佢有个同父异母嘅家姐，于是我用Facebook去搵，亦终于搵到，起初佢根本唔知道我身分，直到同佢有咗感情后，我先话俾佢听，第一次见面在利园嘅Cova见面。第一眼觉得佢好靓女好高大，化咗个好浓嘅妆，唔系好配合一个14、15岁嘅年纪！她当时说生活过得不好，一个人出嚟住，我心想点可能14岁一个女仔出嚟住？觉得佢好可怜。我叫佢带我上去佢住嘅地方，上到去真系吓亲，个心好痛，见到佢一罐午餐肉系食三餐。」
她续说：「当时林俊贤还未见过个女，你哋唔好以为我系爱屋及乌，我当时已同林俊贤分开，我劲记得，Denice同我讲过在外人面前，佢唔可以叫妈咪做妈咪，要叫佢做表姐，因为佢话阿妈仲要结交异性，佢亦提过在她15岁时，其母想介绍她入娱乐圈，而佢唔愿意！其后我陪佢去买家俬同帮佢搵学校，再隔几个月，林俊贤第一次见佢。我十分锺意Denice，佢系一个本质好乖嘅女仔，佢亦成日话我系第二个妈妈。那时开始，林俊贤亦有尽返做爸爸责任，每月都有生活费给Denice。往后，我同Denice愈来愈亲近。有段时间，她住在我屋企，在我公司返工，感情好好，但我知她妈妈不喜欢我跟她女儿感情太好！Denice曾对我说，佢妈咪有时对佢态度好差！今天我仍希望Denice有个美好将来，希望Jasmine能为个女着想，唔好再搞咁多嘢！」
有人教唆林钰洧拍三级片
最后Winnie还说：「Jasmine，你还记得我们曾通过电话吗？还记得Denice住在首任男友屋企时，有人教佢要问男朋友攞钱吗？更有人当时叫她去拍三级片吗？」