李辰安 - 笑到腰痛，哈哈哈｜辰來之筆

打爆個流浪氣球啫，幾乎震散個股市，好擔心強積金投資又有損失，所以好急搵銀行偉請教。

呢個世界原本好好，又話世界和平，大家和和氣氣，殊不知，搞啲咁嘅嘢，世界兩大強國反面咁滯，依家人心虛弱，唔好玩啦。行入去中環小酒館，銀行偉仲未到，但見張翁同大師兄已經坐低吹緊水。「嘩，你鄉下依家好唔掂，勸你有錢都唔好返『鄉下』住。」我好鎮定咁Order一杯威士忌，定定神先，係嘞，唔該加冰。「安仔，有幾聲咳，就唔唔好飲凍嘢啦。」

 

日本爆出核突事件

 

我鄉下有幾唔掂，唔通春節過後，開始又有病毒作怪？都好難怪，十幾億人擠公交、擠高鐵，好難避免人傳人。「你講乜呀，安仔，真係九唔搭八。」大師兄你咪鬧我先啦，我真係想復活節前返去大灣區考察置業事宜，如果依家周圍爆疫，我都係唔好去住啦。

銀行偉此時剛到，佢話全世界都奇怪中國疫情忽然終結，叫我唔好亂噏。「偉哥，係張翁話我鄉下好唔搞，你不如問下佢點解。」大家酒過三巡，講清講楚，先至明白大家原來係一場誤會，即係咁︰一、張翁話佢個鄉下，唔係我鄉下；二、中國疫情高峰已過，證明大疫不過三年呢個民間智慧神奇準確；最後，兩地通關暢順，係就大家約埋一齊下個月去大灣區行下。

「三年無返過內地，好似真係有啲鄉愁感覺，唔知珠海、中山沿途之美食店復常未呢？」原來張翁口中之鄉下係香港人的「鄉下」，即係日本，呢個國家好弊，爆出幾單民間異常核突事件之後，好多香港人依家開始唔認係佢鄉下，好似公司個烈女OL陳小姐，好嬲咁喺茶水間話︰「我無呢啲咁嘅鄉下。」唉，日本已經窮咗三、四十年，以前乜嘢美好時光已經係回憶，既然係回憶就好好珍惜，好好收藏，好好保護，以後唔好返咁多鄉下，或者根本再唔返鄉下，咁咪人生多美好，做乜係都要去日本同啲香港人自己逼自己，逼餐死咁呢？

 

法國巴黎亂局又起

 

「好似我年輕後生時，當年的知性女生，莫不以巴黎為夢想之鄉，當時佢哋唔會話去巴黎當返鄉下，因為機票幾貴下，三幾年去一次，次次忽發春情話要『死在巴黎』，聽落好浪漫，今日再講就笑到腰痛。」張翁，不如飲杯威士忌，可以鎮痛噃。

巴黎，近日立立亂，因為福利講唔掂數，我諗今日你去到巴黎只會重溫噩夢。「安仔，乜嘢噩夢呀？」你都九唔搭八，「返鄉下啦你！」大師兄，返邊度鄉下先，日本呀？不如慳去昂平360好過。

話時話，中國有個民間氣球失控飛咗過去美利堅，搞到出動隱形戰機，又射導彈，搞到個股市嗰心離一離，我想問下銀行偉有乜睇法？「元宵佳節放天燈係中國民間習俗，不過，美國文化同我哋唔同，你都要顧下人家感受。」都無話射導彈咁大件事！「辰哥，無事啦，中國疫情神奇終止，全世界睇好中國經濟復常，你話一兩個氣球又點會阻住個地球轉。」

張翁話，不如去隔籬打邊爐，聽講象拔蚌有優惠價，五百蚊夠四個人食，另外可以搵九龍城生切牛肉打底，包大家滿意。

好啦，一於打邊爐，不過，我想問，幾時真係成班人去大灣區玩幾日？「一定要，預埋上廣州，然後搭高鐵返香港，好唔好？」大家臨去打邊爐之前，飲多杯威士忌，醒呀！

當年的知性女生，莫不以巴黎為夢想之鄉。

法國人不滿現狀，當地經常有示威遊行。

日本有壽司店因惡作劇影響生意，有網民見義勇為，自發光顧。

不少香港人愛到日本旅行。

香港復常後，港人紛紛出外旅遊。