李辰安 - 王百萬與五億探長｜辰來之筆

2023-02-07 00:00

儲錢DIY百萬富翁

今日飲茶，我問張翁，半個世紀之前，家財一百萬係大概有幾富貴，佢無答我，只係叫我食燒賣。

話說有位「炒散」保安員，四年儲咗一百萬，大家起勢咁幫呢位保安大哥計數，其實用呢個時間DIY百萬富翁，都算係奇迹，如果可以講遠啲，簡直係大灣區奇迹啦。大師兄望實我︰「安仔，你都九唔搭八，大灣區係要香港打造成為一個國際創新中心，後生仔要有夢想，要去搞創新創業，唔係要做百萬保安員俱樂部。」

我心諗，全世界都話呢個故仔勵志，點解你話我九唔搭八？無你咁好氣，叫籠山竹牛肉，補下鐵質同鈣質，老實講，男人唔補好易老，我有朝一日退休，都想做四年保安，你知香港退休金、年金都好難夠使，我擔心第二日大灣區生活水準都好高，退休做多四年有一百萬傍身，好似定好多。

張翁話︰「大師兄講得啱嘅，特區成日宣揚呢種百萬故仔，又話有五厘幾息收，咁咪大家都打份工，創新創業搵邊個做？」我都係加多個咖喱魷魚，幾好味，雖然重口味又有味精。

當年千呎單位賣七萬元

銀行偉話，個個後生人都努力去搵一百萬，千祈千祈唔好擺入銀行收息咁唔進取，個人投資好多項目，回報更高。「講呢啲，投資咁大風險，金管局都有損手啦，我就寧願收息。」我忽然好奇問張翁，幾十年前做王百萬有幾威，點知佢都費事答我，唔知係咪嫌我膚淺？「世侄，你係大學生，咁嘅

問題都要問。」係，不過，我無做大學生好耐啦，不如，問下大師兄，佢又知唔知啦。

「我一時答你唔到，不過可以上網查下，美孚新邨1968年賣六十幾蚊呎，於是你可以用作指標，一千呎一個單位，你當七萬銀，一百萬買到幾多個呀？」食山竹牛肉先啦，我最怕計數，會頭暈。

銀行偉懶叻咁，佢話可以買十幾個單位，折合依家一個單位八百萬計，當年王百萬，即係過億身家，又換言之，比起今日保安員之一百萬，多出一百倍，相差都幾大。「飲啖茶，不過唔好食包，等陣叫碟乾炒牛河。」嘩，咁肥膩，新年都食到好滯，不如食鴻圖窩麵，再唔係，炒個飯啦。

「世侄，今日有一億身家其實比唔上六十年前咁富貴，你知啦，依家買部勞斯萊斯都過千萬，住半山兩千幾呎一層樓，起碼七、八千萬，你仲有剩低幾多錢可以消費？可能你諗下諗下，都係搵份保安散工嚟做。」世伯，唔好講笑啦，坐勞斯萊斯住半山，要我做保安，你不如去電視台做編劇。

五億探長身家天文數字

大師兄決定食炒飯，因為廚房大廚好好手勢，唔會太多油，而且保證粒粒米都有蛋包住。「其實，我諗起碼要有五億身家先至可以同上世紀六十年代王百萬相比。張翁，你話係咪？」張翁都好似唔多理睬呢個話題，只係吩咐樓面，炒飯要多葱。終於明白，有錢人唔會叫廚房加叉燒咁老土，等如唔會同你發王百萬白日夢。

「世侄，上世紀六十年代係五億探長（編按：圖為《五億探長雷洛傳2》電影劇照）黃金歲月，你又計唔計到數，嗰時你有五億身家，即係依家乜嘢水平？」我想抗議，成日都要計數，我真係會頭暈。銀行偉又搶答一億乘大五百倍囉，「五百億，咦，都唔錯，你知探長係Hold Cash，唔講得笑。」好嗱，你不如發夢今時今日做五億探長囉。

「安仔，如果全部存入銀行收五厘二五息，即係幾多錢？」夠啦，大家食嘢，唔好再同我講計數。