李辰安 - 人生第一次通宵睇書|辰來之筆

2022-07-12 00:00

我記得人生第一次看書看通宵,日光日白還在看,不是因為考公開試,而係年少時代一個晚上,看倪匡的衛斯理系列。

「細個阿媽日哦夜哦,話我讀書無咁勤力,成日掛住睇電視,點知那些年,我一口氣去圖書館借咗幾本衛斯理,以為可以慢慢歎,殊不知睇完一本又一本,睇到天光仲未夠喉,要睇晒幾本先至肯起身。」大家在中環小館酒聚,無不對科幻小說大師倪匡作出懷念。

「安仔,我哋考入鄉下大學最大收穫之一,就係山頂家書院之圖書館幾乎有齊衛斯理小說,同埋又有金庸小說。」大師兄就借《天龍八部》,我就專攻衛斯理,一於借到盡,盡借幾本系列小說。「忠告借書要還,睇得到咁多先至好借。」銀行偉好似贈我興,不過,我原來一晚可以睇晒四、五本衛斯理,借過即刻還,然後再去借,成家圖書館有二、三十本咁多,發達囉,借幾多都唔驚。

張翁就話無睇倪匡小說,事關人在中環應酬多,平時唔得閒睇小說,但係必睇倪翁主持之夜晚節目,成班才子一齊吹水,睇到好開心又興奮。

講下講下已經幾十年,我好記得衛斯理小說已經有平行宇宙、時空穿梭的前衞劇情,當時無得幾個香港人明解呢啲科普常識,更加難以融會貫通,識創作成本土科幻小說。「衛斯理有古裝武俠情節,又有現代驚慄小說元素,再加上科學思維,嘩,問你如何抗拒呢種原創魅力。」

吹水要有杯酒,所以今日開咗兩支白酒,好啱今日悶悶哋之天氣。「係啦,你點識睇倪匡小說?」其實未讀鄉下大學時,中學朋友都有推薦倪翁之小說,不過,花十幾蚊買嚟捧場,就超出個人預算,去公立圖書館又無咁神心,入咗鄉下大學仲要派到山頂家書院,咁就好方便,行出宿舍一分鐘路程就係書院圖書館,呢家館就係收藏中文小說,一看之下,倪匡作品擺晒出嚟,咁就唔好客氣啦。

張翁話留學美國有香港同學係武俠小說迷,不過佢老人家就好心散,得閒揸車呢度去嗰度去,過陽光與郊野生活,金庸經典未完全讀完一套,後來都係睇電視劇,不過此時已經非少年書迷之年紀,所以感覺不是太深。「張翁,你算係番書仔啦,其實阿爺嗰輩十之八九都係武俠小說擁躉。」銀行偉唔使問,一定無睇金庸、古龍、倪匡作品,事關佢洋化過張翁好多。「偉哥,你有無睇過衛斯理?」

大家講到興起,不經不覺兩支白酒報銷,好唔好換一換口味?唔好,唔好左溝右溝,再來兩支。靚仔侍應碧咸仔睇波唔睇小說,所以無行過嚟湊熱鬧,也許,呢啲就咪叫做代溝囉。「後生仔好多係日本動漫迷,呢個潮流已經悄然改變。」碧咸仔話自己都無睇日本漫畫,不過,佢好鐘意去日本旅行。

銀行偉話有認真睇過衛斯理之《藍血人》,因為有美國NASA背景,講起美國當年航天最威水時代,率先去木星,睇睇下又有中國古代歷史,講到太平天國,真係服咗大師之過人知識,以及高超之想像力。明白,銀行偉係因為有美國背景先至睇得開心,偉哥真美國人也,鑑定完畢。

「安仔,你又幾時戒得甩睇衛斯理?」好簡單,就好似好多香港後生仔咁,借到無得再借,就唔戒唔得啦。「即係咁,成家圖書館之衛斯理畀我日吼夜吼,又加預約,睇晒嘞,便功德圓滿,於是追求人生最廣闊之目標,例如追女仔。」眾人大笑,我馬上澄清︰「我講係轉去睇王晶之追女仔電影系列。」點解唔係真係追女仔,你有追女仔困難症?「大師兄,睇王晶追女仔電影,裏面有曼玉、楚紅、青霞,現實生活又邊有如此精采?」

張翁話我言語藝術,忽攸大家咁話,算吧啦,吹水唔抹嘴,你睇差不多又飲到第四支白酒。「不如大家歇一歇先,食下生果,休息多陣去晚飯,好唔好?」其實人生如小說,真係唔使太認真,最緊要開心,同時又無記掛。錢係搵嚟使,千祈唔好剩低,當然,以上人生哲理適用於搵過大錢之人,不是我等成世掹掹緊之流可以配用。

今晚食乜好?轉轉口味來一次韓國燒烤。「唔好啦,熱氣。」銀行偉投反對票,無計,都係去中環小廚叫個冬瓜盅,一於咁話。

關鍵字

最新回應

相關新聞

熱門文章

You are currently at: std.stheadline.com
Skip This Ads
close ad
close ad