李辰安 - 唔好認親認戚認鄉下|辰來之筆
2022-05-24 00:00
今日去飲茶,心情不算太好,雖然有專家話可能第六波疫情年底先有,到時大家又要天隔一方,無得坐齊四個人飲杯茶、食個包。
「辰哥,乜大灣區呀,早排珠海、中山、佛山都水浸,成個海咁誇張,如果你去買樓,睇定啲先好噃。」銀行偉彈咗幾段視頻畀我參考,我同大師兄望下,嘩,又真係幾壯觀,成條大街要用衝鋒艇出入,成個鎮癱瘓,大家唔使上班咯。「喂,世侄,你睇有人喺條街捉魚,係真唔係真?」張翁,你真係好眼力,的確有人捉魚,是否苦中作樂,我唔係當地人無法知曉,你話呢?
茶樓老闆聽見個魚字,走過嚟推薦蒸條石斑,斤零重最相宜。「李生,二十幾三十年前中上環雨季經常水浸,你記唔記得。」當然有印象,當年電視台例必大做水浸新聞,上環海味鋪成重災區,十幾家大鋪都變成澤國,損失慘重。「係囉,依家無再聽過水浸上環之新聞,仲有元朗、流浮山都好似無水浸,點解呢?」
香港搞足好耐工夫先至搵到治水辦法,一個城市之建設需要好多經驗先至可以管理得好,大灣區近二十年先至城市化,你估咁易一剔過咩。「辰哥,所以你要去內地置業就要留意治水問題。」偉哥,早排大雨十幾日,成個珠三角城市都有水患,點好呢?茶樓老闆話︰「你要買個大雪櫃,可以儲一星期菜同肉,留意天文台消息,買樓最好十樓以上,家中備長筒水靴。」
睇嚟老闆真係對退休返大灣區之事有準備。好啦,飲食都係緣份,今天就蒸條石斑,再來一碟招牌燒腩仔,好唔好?「安仔,如果第六波,你估有無第五波咁勁?」大師兄,乜你頭先唔係好樂觀咩?「我話第六、第七波都係數字概念,你可以當無事發生,好似歐美國家都已經唔使戴口罩,所有活動正常,你傳我、我傳你先至正常,傳下傳下,社會人人都有自然抗體,從此新冠拜拜。」
銀行偉話新冠好難清到得個零,你睇銅牆鐵壁之朝鮮都被破防,問你點防?「所以大家要打針,打完三針,再打四針,中招都唔驚,依家最驚你又無打針,又無中招,即係無任何抗體,咁先至係危險。」關於新冠之事,我諗講到呢度為止好啦,事關大家又唔係專家,就算專家都唔敢講到咁實牙實齒,不如珍惜今日有得四個坐埋一枱飲茶之美好時光,講下令人開心之話題。
講開又講,內地樓市經過大半年不利消息影響,聽講6月可能有起色。「係呀,消息人士話內地領導層見到經濟有下行壓力,因此考慮釋放一下市場活力,於是大家憧憬樓市可以側側膊不受限購措施影響,有錢人見樓價已經跌唔少,於是又去買樓。」
我最想知香港樓市如何?「辰哥,總之唔會跌,尤其無可能大跌。」又唔係咁話啦,你知新班子上場會點呢?搞個八萬五好唔好?「喂,喂,條魚嚟啦,食魚先,唔好掛住講。」
條魚好新鮮,蒸得又啱啱好,真係食咗至講。「安仔,日圓貶值,有無諗住返鄉下旅遊?」吓,你當我係班年輕人?我鄉下喺大灣區,水浸嗰度呀,我點敢高攀大和民族,鄉下鄉下,你千祈唔好認親認戚。「係嘞,世侄你講得對,依家日本已經唔係吳下阿蒙,歐洲國家元首排隊過去訪問日本,同岸田文雄拍膊頭,美國有意將日本列為亞太最親密之盟友,同英語國家平起平坐。」
大師兄即時幫張翁補充︰「日本百年夢想係脫亞入歐,依家好似有機會夢境成真,所以你話日本係你鄉下,好似太過Up grade自己,你都想做歐洲人,無咁易。」
真係恭喜晒日本,係終於有機變成歐洲人。話時話,你啲Yen唔好升住,畀個機會香港人有個平價旅遊日本之機會。好啦,條魚講咁快食剩棚骨,唞唞先。
關鍵字
最新回應