辰來之筆|打邊爐真幸福
2021-12-07 00:00
終於到了2021年最後一個月份,你問我有乜願望,最想大家整整齊齊來一次朋友歡聚打邊爐,點解呢?
「世侄,你做乜講埋啲咁嘅嘢?你唔見o依家個市旺過舊年好多,我細細聲話你知,我要碌人情卡先至打尖攞到呢張枱,你咪以為我六時恭候,你就六點半入席喎!」你知啦,我唔知要食高級名牌火鍋店反而要排隊,平時食開嗰家平價街坊任食火鍋就唔使等,首先謝過張翁。
銀行偉用佢職業視野同大家補一課內地打邊爐行情,真係唔該晒。「火鍋行業原來幾好做,嗱,上世紀八十年代有飲食界朋友Sell我合資在旺角開一家三層樓高之粵式火鍋店,當時我好想落搭。」張翁就充當香港倒後鏡,搶咗銀行偉個話題,先來一個香港火鍋發展簡史之介紹。
原來佢後生之時,粵式打邊爐係大排檔生意,好少人會開個似樣之大店經營。「世侄,當年只有北方涮羊肉先至會店面經營,全部都係走高級路線,所謂粵式打邊爐係大家坐喺街邊烚下烚下,通常你用大中小之大雜燴形式上枱,即係有魚片、牛肉、肉丸、雞件、水魷、蝦、蟹、一兜生菜,加幾隻雞蛋咁。「係啦,我細個跟屋企人去廟街食唔少,仲有喺上環大笪地,九龍城就有好出名之炭爐潮州沙嗲牛肉火鍋。」張翁話︰「一般而言,因為要踎響街邊用個背脊擋着寒風烚下烚下先至有風味,所以大熱天時就無人打邊爐。」後來飲食界人士去過泰國,見到當地係熱帶地區,竟然時興四季都照打邊爐,就恍然大悟,如果開大個冷氣在室內打邊爐,有乜問題,於是取經過來,上世紀七十、八十年代大力宣傳四季火鍋呢個Concept。
好啦,大家唔好講咁多,先來一輪大啤酒,跟着先嘗一下靚靚大生蠔,跟住會上今日主角菜式象拔蚌。大師兄話︰「我有位親戚係做火鍋店部長,佢話四季打邊爐個商業模式好Work,因為唔使廚房工序,最多係要切肉同分菜式,減省好多工夫,所以火鍋店老闆都幾好賺,後來全港都跟風,你開我又開,以致競爭好大,如是者,粵式四季火鍋店就無咁好賺,加上行內水準參差,唉,過多一陣,就變成火鍋店泡沫,只有少數可以生存。」
銀行偉問大家鍾唔鍾意食和牛,叫碟大家共享。「喂,你望下個價錢先,我見過名牌火鍋店,要三千蚊一碟。」張翁建設都係食新鮮切牛啦,和牛好食,但性價比唔啱數。「偉仔,早幾年自由行高峰期,內地同胞對三千蚊一碟和牛最捧場,我同行內人士相熟,佢話內地豪客通常Order三幾碟,然後一二三,一齊放入個鍋,正所謂一鑊熟,眼都唔眨一下。」係囉,唔似我哋本地人烚下烚下,其實食象拔蚌都好豪啦,一於聽前輩之溫馨提示。
講開又講,內地原本火鍋成行成市,先有超高服務水準之乜乜撈連鎖品牌店,廣受大城市中產後生仔女歡迎,不過,聽銀行偉講,近年因為擴張過快,加上管理及各方影響之下,Business Model開始有問題,所以會執幾百家以收縮戰線。
大師兄話︰「原因係大城市高級打工仔消費力不似從前,好似早幾年大行其道之潮州牛肉火鍋都不再流行,原本是風行全國,o依家變咗零丁落索。」幾年前我都去過深圳食潮州牛肉火鍋,不過確係幾貴,一個人二百幾蚊人仔,食過兩三次我都無再返轉頭。講時講,內地消費者能力減退了嗎?偉哥,你點睇?
好啦,食牛肉先啦,好新鮮又腍,但腍中又幾爽口,性價比一流。跟住落嚟上鮑魚仔,嘩,今餐好滿足,o依家食多幾箸菜同冬瓜,回一回氣先。
二十年前,內地全國興起四川麻辣火鍋,當時我後生又有胃口,所以變咗四川火鍋迷,仲要食到面紅紅為止,講起都幾得人驚,o依家唔會咁搏命啦,食下海鮮火鍋,清清哋咪幾好。「大師兄,幾時可以通關,過返以前內地飲食之休閒生活?」大家都好似無嘢講,係啦,唔好諗咁多,仲有嚿鮑魚,唔該,留返畀我呀!
關鍵字
最新回應