辰來之筆|飲食夢驚魂

2021-11-16 00:00
  這個星期有點冷,不過好在有家小酒館可以畀大家棲身,飲大杯啤酒都無問題,今日有熱鬧話題,講到大家㷫烚烚。
  我收到好多朋友圈發出之香港舊相,發香港古幽之情,最啱聽就係關於本地老字號的故事。張翁講到脫下外套,回憶當年尖沙嘴之飲食故事。「當年好多北方正宗小館,又有台灣菜面世,大家朋友聚舊有太多選擇,最記得有家台灣館子,飲到咁上下,你以為自己身在台灣,真係恍如昨日之事。」不過,張翁有一次好似電視劇之驚險故事,話說食到酒酣耳熱之際,這家有好多江湖人物出入之名店,忽然出現來路不明之十幾名刀客,仲有幾個守住大門口,其餘衝入某廂房看似尋仇。「我好記得正在食烏魚子,真正寶島空運而來,剛剛煎好切片上來,就目睹一幕難忘之情景。」嘩,你講緊上世紀七十年代香港風雲故事咩,咁你點算好?「坐定定啦,你估我好打得呀?夥記們細細聲講,定啲,唔好周圍望,最好繼續食嘢。」係囉,內急都唔好去廁所,Call機響都暫時咪行去櫃台覆機。
  「我都飲到幾分酒意,所以個膽壯壯哋,唔怕,一於食住烏魚子等。」等咩?等散場,通常一陣就會做完大龍鳳啦,你估拍《龍門客棧》,擾攘十幾分鐘?
  銀行偉今日扮占士邦,一杯馬天尼下肚,好似好嗨,問張翁有無躲入枱底?「偉哥,你都九唔搭八,人家又唔係搵你,你無啦啦捐入枱底,好易惹人誤會,你都無啲危急求生常識。」係噃,講開台灣,o依家好似好緊張,出年有關當局會印製平民急難求生手冊,到時人手一本。「安仔,你講呢啲,飲杯馬天尼啦!」
  張翁話當日好戲劇性,因為幾名刀客踢門入廂房,十幾秒就發矛走出嚟,有人大喝一聲咪郁呀,我係CID。原來房內不單止有大佬,更加有皇家警察便衣探員在內。「真係都未食完片烏魚子,全場已經被控制。我好奇問句︰「有無人好似石堅叔咁出嚟打圓場,叫大家繼續食、繼續飲,無事啦!」張翁笑笑口話,嗰位皇家警察去櫃台打個電話,然後叫部長攞多支XO入去,淡定過石堅叔。「咁係唔係報警求助?」無,不過隨後多咗十幾名彪形大漢上嚟加入飯局,成家台灣小館又熱鬧起來。
  「安仔,你不如諗下寫番個香港上世紀七十年代嘅風雲故事啦!」我想一想先,「都好,大師兄,小說中最好加插時空穿越之AI機械人角色,場景會變成AI機械人大戰。「世侄,你唔好話有Terminator阿諾舒華辛力加,咁大殺傷力,你想我呢個路人甲變炮灰?」我話,定啲,不如大家飲多Round大杯啤酒先,諗下有乜好橋。
  大師兄話上網睇過一個真人故事之視頻,上世紀五十年代,又係關台灣事之驚險場面。「當年國民黨在台灣,香港是間諜中心,有位風雲人物,好似無去台灣留在香港,唔知咩事得罪某方,風雲人物為人高調,經常光顧旺角一家涮羊肉名店,於是某方派出殺手,吼準時機闖入,掏出手槍,三響之後風雲人物倒地,殺手揚長而去。」大佬,你講緊亞倫狄龍(見圖,黑白圖片)上世紀六十年代經典作品《獨行殺手》乎?
  「世侄,上世紀五十年代好多真人真事之間諜戰在鬧市發生,呢單新聞我都有印象,當時賣晒新聞紙,我老竇帶我去飲茶,同隔離枱班大叔傾到唔捨得走。」我又諗起《教父》阿爾柏仙奴飾演之小教父,為兄報仇,又係在餐廳做低對頭人,睇嚟江湖人物如果要安全保險,都係搵馬仔去超級市場買嘢返屋企自煮,外賣都唔好叫,你點知會唔會有個亞倫狄龍扮外賣仔。
  「安仔,你加埋周星馳外賣仔元素入你個穿越時空香港風雲故事,咪幾精采,你最好加埋007占士邦入去。」即係點?好難溝得埋、撈得勻噃,前輩,不如改個國產凌凌漆入去,或者東方007都得。
  大家講下講下,覺得有啲肚餓,食咩好呢?打邊爐合時,不過唔好又去嗰家任食火鍋啦,好唔好?「世侄,嗰處唔使排隊,價錢又相宜。「不如去西環大排檔好過。」原來已經無打邊爐大排檔好耐,我唔通又係穿越咗時空。「快啲決定,人家收鋪啦!」好,大家飲埋呢杯先,行過去幾分鐘,唔使急,但求食飽,返去可以專心寫小說。

關鍵字

最新回應

相關新聞

熱門文章