慢讀樂趣|家居維修翻新50問 行內精英講解種種疑難

2021-11-02 00:00
關於家居維修,「唔識就畀錢人換」這想法已Out,應該走出Comfort Zone,自己屋企事自己做。
關於家居維修,「唔識就畀錢人換」這想法已Out,應該走出Comfort Zone,自己屋企事自己做。

《家居維修翻新50問》兩位作者是IT初創公司「裝修佬」的成員,鄧世民是裝修學院校長,陳以璇是「裝修佬」編輯,合作製作了這本裝修小百科。

我有好多朋友準備移民海外,不過,無論是去瓦努阿圖,抑或美加、英澳,甚至返大灣區也好,你一定要帶埋這本書離開香港,因為身居異地最頭痛就是家居維修與裝修,我敢擔保,全世界最容易搵到裝修佬、水電喉師傅,而且收費最相宜之地,莫過於東方之珠香港!

這本書設計獨特,使用十分方便。書介這樣說:「本書由九位專業行內人,安排四百四十八幅詳細圖解,並且加設一百一十四段影片,一掃QR Code即睇,還有一百九十三條常見問題Q&A。強大師傅陣容悉心指導:裝修工程項目總監、室內設計顧問、一級水喉匠、鋁窗技術顧問、窗簾設計師;坊間少有,絕對是最地道!」換言之,這是集香港裝修界精英之大成,你不買都要看看。

但你點可以看看就算?即使你不是移民也好,今時今日都應該要有家居裝修與維修知識,作者指出,有了這新書,你就「不用苦等師傅,不用上網找答案,收錄五十個最常見家居問題──打風窗邊滲水、浴室門框霉爛、洗手盆去水慢、冷氣機滴水、鐵閘鎖壞、螺絲滑牙生鏽、木家具被刮花、蝴蝶餐枱腳鬆、USB插頭失靈、WiFi接收不良、假天花燈燒了、手機掉落牀邊、牆身起泡泡、趟門路軌不順……。」

「唔識就畀錢人換」這樣想你就Out,好多人就是不肯走出Comfort Zone,尤其是九十後,事關從小有家傭幫你手解決大小事情,於是養成一班「香港葉大雄」,有乜事就擘大喉嚨大叫︰「多啦A夢,你快啲嚟啦,幫手搞掂佢呀!」於是乎好多人就算好彩可以搬出去住,其實都有問題,因為家中有少少嘢都唔識修理,正所謂修身齊家平天下,年輕一代齊家有問題,香港點算?仲有前途咩?作者畀定大家一顆定心丸︰「就好簡單,只要肯學,你都可以輕鬆打造Dream House!」

大家都知,香港人最重視有個「安樂窩」,然而家居大大小小問題,難免時不時要搵專業師傅上門處理,相當肉赤。其實只要肯學,你都可以「自己屋企自己整」。以下列舉十幾種常見家居問題︰橫風橫雨,鋁窗、冷氣機不斷入水;點搞?又例如,浴室門框邊霉爛,你識唔識進行批灰補油。朝早起身刷牙洗面,忽然見到洗手盆去水好慢,無多啦A夢現身呀,朋友,你最好識得動手清理隔氣及通渠。再考你一個家居IQ題︰如果鎖匙斷在門鎖內,怎麼辦?其中一個方法可用錘子,輕打鎖孔邊緣,讓斷掉的鑰匙慢慢被震出來。再來一條必看題︰鐵閘鎖壞了出不到門,除了打電話報警求助之外,原來可以用螺絲批簡單拆鎖自救……

我曾經出現一宗尷尬的家居意外,就是走去垃圾房時忘記帶鎖匙,家中無人,大門「嘭」一聲關了,我只穿輕便單薄便服,但當時室外氣溫得攝氏十幾度,點算好?其實本書都無得教大家點解決,不過,有位親戚教了一招「膽博膽」的方法,就是在門口地毯底放一條門口鎖匙!當然風險高,我亦不建議大家如此「聰明笨伯」,此時此刻最好就是落樓下管理處,找二十四小時服務開鎖師傅。不過,你可以唔擺門鎖匙在屋外,可以考慮放件外套,事關當日我在家門之外,真的是凍到「頂唔順」,事後要食中藥醫傷風。

家居智慧要掌握,尤其是對付家中的「小強」,好多女士最怕見到「小強」,但係你愈怕佢,佢就愈會出現。本書有絕招教大家滅除「小強」,方法原來好簡單。大家可以買這本書來參考。至於日日與你有切身關係的廁所問題,例如最常見又頭痛之座廁水箱不止水,你如何冷靜處理?

如果你無打算移民,又無打算自己搬出去住,大小問題都有人幫你打理,是否有需要看這本書?當然有,我有位朋友好有女性緣,追女仔好本事,不過,他不是英俊瀟灑小鮮肉,而是最叻幫新相識、女同事解決大小家居問題,甚至可以維修WiFi、電腦等小問題。換言之,以一個萬事通的暖男形象出現,佢打贏好多靚仔。如果是女的話,你都要參考本書,因為追男仔除咗靚,你識得持家管理,可以得到不少分數,好多男士就是最Like呢類能幹務實型女朋友。明白了嗎?

《家居維修翻新50問》

作者︰陳以璇、鄧世民

出版︰紅出版(青森文化)

售價︰$118 



關鍵字

最新回應

相關新聞

熱門文章