辰來之筆｜第三空間美少女

時興第三空間概念，意指現實之外還有一個時空，我就唔知點解，不過，覺得好有想像力，最啱寫新潮小說。　

我臨瞓之前上網，睇到一個視頻介紹日本神劇，講一位有特異功能之美少女，父母雙亡，投靠舅舅，豈料這位親人要利用佢。「安仔，人類係存在三維空間，再加上時間就係四維空間，呢個係愛因斯坦『相對論』概念，你讀文科，唔該咪亂拋書包。」大師兄，寫小說要拋開書包，我並不是有志做科普作家，怕乜？

銀行偉又來搶鏡頭︰「辰哥，有個哈佛美女教授挑戰愛因斯坦，認為仲有另一個神秘空間和世界存在。」我大啖飲完一杯啤酒，諗下銀行偉有道理，寫小說最緊要有紋有路，似層層就OK，三、四、五、六維無問題，重點係科學家話喎，宇宙有一個神秘空間，咁咪得囉。

講返之前嗰位日本美少女。故事係美少女有陰陽眼，係遺傳自母親，所以舅舅知之甚詳，於是利用佢做一種好神奇之服務行業。「辰哥，你講故仔都幾曲折離奇，日本美少女被舅舅安排做邊種行業？」不忙，先來多一杯啤酒好唔好？

我真係服咗日本人之編劇技巧，陰陽眼呢條橋好舊，舊到無人肯再用啦，偏偏就有新意思，要寫大大個服字。「邊種行業，你唔好想多咗，呢一個係創新嘅服務行業。」美少女有陰陽眼，能見到靈界之物，還可以與之溝通，於是佢可以去凶宅做打掃工作。「即係點呀，辰哥？」好簡單，舅舅安排美少女入凶宅住幾日，宅內之冤魂好自然會現身同美少女溝通，把前世未圓之事拜託對方完成，然之後便安心離開，凶宅咪就無鬼啦。

「呢位舅舅就係咁利用美少女去幫佢賺錢，美少女因此而結識不少異靈好朋友，幫佢哋解決問題，又或者幫手解決冤情命案，於是構成一本城市新潮聊齋故事。」大家似乎對以上題材好有興趣，張翁首先提供香港故事。「上環係十二少同如花故事之發源地，其實呢一區流傳好多上世紀二十年代哀怨糾纏之異靈故事，梅姐同哥哥合演嗰套戲就係經典。」對啦，不如張翁你扮萬梓良個角色，同如花穿越相遇。「安仔，你真係九唔搭八，如此炒冷飯之橋段，點見得人？你仲要張翁扮劇中人。」講笑而已，係都叫張翁扮十二少啦。

唔好扯到咁遠，我想講番創作。嗱，之前講乜嘢乜嘢第三空間，我哋唔好再講陰陽眼啦，你就話日本美少女原來係第三空間之人物，所以能出能入不同界別，咁係咪新鮮好多。「世侄，你有想像力，第三空間係科學界最神奇未解之現象，寫起小說嚟，好似好有科學根據。」

大家馬上起草了一個《第三空間美少女》系列之故事大綱，不過，美少女去做凶宅打掃行業，好似唔多夠勁。「不如就學英叔之殭屍道士系列，咁就得啦！」我好難想像把英叔之角色，代入一位穿水手服之第三空間美少女身上，究竟會出現如何神怪離奇之景象，不過，都可以試下創作嘅。

為咗鼓勵大家集體創作，張翁請大家來一瓶葡萄牙雞尾酒Sangria，好，非常好！「話時話，第三空間可以話係通陰陽界限之人，三十年前有英叔道長，今時今日咪就係開心少女鬼？」乜鬼啫，人呢㗎，可以穿梭不同維度之特異奇人。「安仔，你諗到故仔未？」我就想番起細個時去秀茂坪，陪阿婆一個同鄉親戚去搵問米婆之經歷。

「辰哥，美少女最緊要新潮時尚，唔好諗番轉頭去羅蘭姨個神婆形象，如果咁樣發展，相信吸引唔到年輕人。」好，我就用日本美少女嗰個景場去幻想，但佢係有英叔之道士特異功能。「世侄，唔好諗來諗去都咁傳統，呢位美少女係一個小小科學家，好熟愛因斯坦『相對論』，又識得用量子力學武器，例如用量子糾纏玩瞬間移動，分身去第二個時空，用量子槍去擊破敵人。」

嘩，飲得幾杯，再加埋大家一輪嘴咁講，我真係腦震盪，等等先，好多科學情節，我一時未能消化，大家可不可以簡單啲呢？我原先講嗰個日本故事邊有咁複雜，大家返番去倪淑君套《陰陽界》算啦！「喂，你又話第三空間美少女嘅？」無你咁好氣……
文：李辰安