星島日報

廣東話俗語妙到毫巔 言語藝術精讀

2020-10-20 00:00
  廣東話是大灣區用語,香港人除了講廣東話,這些年也創作了不少「港東話」,這本書記下大量時興廣東話俗語,值得參考和收藏。
  廣東話精深博大,原因是廣東人很有幽默感,說話不是一板一眼,更加不拘泥於甚麼文法規律,最緊要傳神,形象化之餘,也很視像化,更有借景、借情,穿越場景的技巧,可謂妙到毫巔,點到你唔服!隨手揀一句精用廣東俗語︰「冇咁大個頭,唔好戴咁大頂帽」,如果用工整的中文表達,就是不要「好大喜功」、「不自量力」,語氣太白開水了一點。想像一下,你馬騮仔咁大個頭,戴一頂黑毛豬Size的帽,你話幾滑稽搞笑呢!你會由頭笠到頸,行出一步都會仆親,是不是?所以凡事要好似香港「超人」教大家,量力而為,係冇?
  「嗱嗱聲/嗱嗱臨」可以肯定是百分百香港原創,不知誰是原創者,不過上世紀七十年代歌神許冠傑將之唱到街知巷聞︰「嗱嗱聲即刻走去搵嘢做,人必須知道自己嘅用途。」此曲《搵嘢做》,填詞人是來自草根階層的黎彼得,他很有意思。話說這位小時住木屋區、少年便出嚟碌之有為青年,言語藝術一流,他與那些年讀過大學的精英,最大分別是U仔不單止要三句夾一句英文,同人溝通講人生與社會大道理之時,最鍾意賣弄以英文文化倒裝之生硬技術語言,來說明明知別人聽不明的道理,以示與眾不同、學貫中西,精通馬克思到佛利民學派要義,即本書指用的一句廣東俗語「扮嘢/扮晒嘢」,甚至是「扮晒魚蝦蟹」!
  黎彼得反其道而行之,因為出嚟碌要有溝通技巧,三言兩語說得明白還未夠,一定要你聽見即明,而且要留下深刻印象,如此這般,你才可以撈得掂。
  請繼續欣賞黎大師的歌詞︰「著著聲即刻走去搵嘢做,人必須旨意自己創路途,快去奮鬥你實會攀得高,你要坐Benz靠自己個腦。」精警之處在於不用同你講《資本論》,抑或《資本主義與自由》,你就明白最簡單之經濟理論:一、如果你要取得「原始資本」,即是俗語話齋「第一桶金」,唔該你咪坐喺度得個諗字,除非你是富二代,否則一定唔好怕畀人剝削「剩餘價值」,快快搵一份工去做,只要做得勤奮,事事早人一步,在香港「獅子山精神」模式下,你一定可以出頭。二、當你賺到錢又有人脈,可以做老闆之時,千祈要記住改變思維,咪以為死做爛做就可以成大器。此時你要用活個腦,即是要有創新能力。從坐巴士/港鐵到有司機開Benz車你出入,這一個階層突破,需要講求智慧,否則你還是走不出勞動階層。
  以上大道理靠書本來傳道授業,可能呃你幾年學費,聽一首歌就有嘢落袋,廣東話意境之神奇,盡在不言中。港式廣東話俗語,跟古法粵語一脈相傳,都是神來之筆勝千言萬語,有句舊式歇後語好抵死,叫做「醉酒佬數街燈」,你聽過未?後邊嗰句係「不知幾盞」。兩句話如同冰山與火,基本上大纜扯唔埋,不過產生巨大的化學作用。首先,幾盞,第一層意思指街上有幾多盞街燈,飲醉了,你當然數極數唔清楚有幾盞。原來,廣東話俗語形容你十分享受,自我感覺良好的心理狀態,又可以用好盞鬼來形容。於是乎,你以為此俗語係描述飲醉蒙查查,其實是話你樂在其中,難得糊塗。
  講開醉酒,另有一句還要抵死的是「生仔姑娘醉酒佬」,大家要用點想像力。姑娘乃指入世未深之花季少女,一個唔覺意懷孕,弊傢伙了,再到瓜熟蒂落,更加辛苦不足與人道也;同理,飲到酩酊大醉,又吐又嘔兼夾失儀,其實並非過癮。如是者,大家清醒過來一刻很是後悔,不過,姑娘還是姑娘,醉酒佬還是醉酒佬,事後必然再度尋歡,何止事必過三。
  笑聲笑聲滿載溫馨,大家看過了生鬼有趣的廣東話俗語之後,本書後半部為大家提供實用課程,就是教大家《中華文化‧禮儀用語》,以及筆者小學時代讀過之尺牘。更加難得有齊《家族親戚關係稱呼【廣東話版】》,大家要用心記住,仲要不忘薪火相傳,以免廣東禮儀文化失傳。好啦,歡樂時光過得快,又係時間講Bye Bye,下周再見!
  《通學:一書讀通 廣東話俗語》2020新修版
  作者:廣東話資料館
  出版:亮光文化有限公司
  售價:$88
  

最新回應

相關新聞

熱門文章