星島日報

大話過《大話西遊》

2020-09-22 00:00
  乜嘢叫做報復式消費?即係幫手同就快退租之商店掃貨。多謝你,你的報復為香港經濟減少了一點損失。
  今日黃昏人齊,大家準備報復式飲多杯,呻下被社區隔離之冤鬱氣,之不過,又不可以去到太盡,今晚飲完要返屋企寫網絡小說。「吓,安仔,你認真的?都係嘅,成日得個講字,咁耐無開筆,o依家一定係谷到報復式寫小說!」大師兄,又關報復乜事,你飲多咗定想多咗?其實我日日都有創作小說,之不過,是在腦海中加工醞釀。唔係要走去撻着部電腦,在鍵盤敲出文字先至係寫小說,你以為創作係咩?這是等如有生命的植物,你看不見它的呼吸,但是它悄悄的生長。
  「世侄,無人逼你創作,更加毋須要你報復,大家要明白新冠只係香港其中一首插曲,話咁快我哋大家在獅子山下相遇上,總算是歡笑多於欷歔。」跟手大師兄接住唱︰「人生不免崎嶇,難以絕無掛慮,既是同舟,在獅子山下且共濟,拋棄區分求共對,放開彼此心中矛盾,理想一起去追。」我一啲唔覺得勵志同感人,但唔關首歌嘅事,係呢兩位酒友好似家英哥對住星爺唱《Only You》咁嘅感覺啫。大佬,我唔通好似孫悟空咁燥底,大聲話「你唔好再煩我,我一嘢隊死你」咩!當然,隊酒個隊,大家唔好誤會。
  「喂,世侄,唔通你想寫本《大話西遊》?幾有諗頭噃!」咁上下啦,張翁真係同我心有靈犀。「辰哥,靈犀一指係陸小鳳絕招,你拉埋佢去取《西經》?」偉哥,你不如搵星爺開套戲,搵埋你扮陸小鳳好唔好?你咁甩皮甩骨,我心諗,當然無講出口。我幫偉哥Order一杯豬肉佬同占士邦都飲之Dry Martini,醒下佢啦。
  「安仔,最早扮占士邦,好高調飲馬天尼係諧星大衛尼雲,你知無?佢做咗一千零一次007,仲係笑片,呢部戲我喺銅鑼灣樂聲戲院睇,片名《鐵金剛橫掃皇家賭場》,成半個世紀之前囉。」我好似唔知邊位係大衛尼雲,估計佢部電影上畫之時,張翁係少年十五二十時,可能開始約女朋友仔睇戲。「無噃,成班百厭仔踼完波走去買飛,因為當年電影宣傳話明美女如雲,有烏蘇拉安德絲,女一係狄波拉嘉。」噏一大堆,我淨係知道烏蘇拉安德絲,佢同辛康納利乃正宗占士邦同邦女郎配搭。
  「偉哥,你杯馬天尼得唔得?我離遠望你,你成個007咁款。」其實應該係「零零漆」,點知佢大大聲問︰「似丹尼爾基克,定係佐治拉辛比?」真係好難答,我唯有舉起杯啤酒,祝佢身體健康。

香港版魔法學校

  講開網絡小說,源於過去幾十日受疫情影響,非常之無聊,好想神遊出外,找一點生活新鮮刺激感,想起幾年前好開心睇《哈利波特》,不如改寫成一所香港版魔法學校,寫班同學仔喺呢度返學,暑假幫唐僧取《西經》當交流活動。
  「嘩,霍格華茲學校招生,爆棚啦,你知唔知好多家長排隊去搵英國學校?魔法學校有咁大間宿舍,又係名校,睇怕要通宵排隊。」偉哥,你杯馬天尼好得,飲到你咁High,之不過,霍格華茲係好橋,馬上就可以度出四個徒弟出場,加一個做唐僧之老師帶隊暑假取《西經》,有幾分《小飛俠》Feel,又可加插《大話西遊》情節,就好似雞尾酒咁精采。
  「世侄,最緊要美女如雲,唔好淨係得幾師徒,Dry過Dry Martini,一定唔會吸引。」當然,當然,我知道,蟹精、蚌精一於搵好似烏蘇拉安德絲咁嘅水準扮。「唔係噃,西域風情,一定要想像幾個好似迪麗熱巴之角色。」偉哥,如果要寫《大話西遊》,可以有好多個艷麗角色,寫埋韓國女團做妖精都可以。
  一講到以上話題,小酒館之氣氛幾乎失控,霎時之間,本地疫情好似煙消雲散,我行出門口幾乎唔記得戴口罩,唔知是不是好事,屈咗咁耐,今日先至見到有咁多人集體歡笑。
  如果真係有魔法學校,會唔會有牛津、劍橋收你,你都唔吼,走去讀霍格華茲?「安仔,你話呢?o依家最緊要一技傍身,你識得魔法,仲攞到英國認證,你一定有得撈。」大師兄,係就兩分,你就真係做大師兄,我就做二師兄。
  你知唔知我有個親戚個仔,去英國前後讀咗七年書,前年返咗嚟,吊吊揈一排,o依家阿仔走去學水電維修,又學髮型,做乜?因為佢一家人想搬過去英國生活喎,佢要裝備下自己,唔係過到去無得撈,真係哈利波特、大話西遊囉……下刪一百字,下周再見。

文:李辰安 圖:星島圖片庫
李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。

最新回應

相關新聞

熱門文章