星島日報

新冠本地遊

2020-09-15 00:00
  終於等到可以四人一枱坐,是日與中環酒友到名人茶樓午飯,大家好似幾十年無見面一樣,太多話題了。 
  大師兄問我,有乜本地遊好介紹,我話行山原本係好提議,不過,人滿為患,想泊車好難搵到位,坐巴士就唔好預我啦。「世侄,中環都有好多本地景點,使乜坐公共運輸工具。」唔好玩啦,張翁,你叫我行「孫中山史蹟徑」呀?我又唔係內地同胞,行完之後排隊食牛腩麵咩?無興趣。
  銀行偉近日埋首研究科技股,睇佢臉色紅潤,精神抖擻,成個有運行咁樣,吃蝦餃都有型過人,於是請教佢有無好介紹,畀個冧把大家,點知佢話不如講下香港本地遊好過。
  「辰哥,科技股有乜好講,尤其是神州科技公司,只要嚟香港上市你就去抽新股,起碼一兩個Dup,講多浪費時間。」係無?呢鋪阿爺唔玩自由行幫香港,改為全民炒股發達,邊有咁大隻蛤乸隨街跳?「你又唔好咁講,你都無記性,十幾年前,我哋有幾個師弟,畢業無去搵工,淨係抽新股,已經發咗達。」係,抽完新股有首期上車,然後細樓換大樓,一間變幾間,發到三十五歲就退休吖嘛,師Ching,歷史可以重演,唔怪知得香港有咁多人以為今時今日可以做孫中山。
  「辰兄,中國歷史我唔曉,請問孫中山先生當年有落嚟香港炒股炒樓?我真係鄉里囉。」我望下銀行偉,佢唔似窒我,佢係真無知,算啦,無謂教精佢。「偉仔,樓市你又點睇?跌緊噃,有無得諗?」張翁,香港樓更加穩陣過科技股,你睇今次新冠疫情惡過之前「沙士」,樓市依然紋風不動,新冠疫苗就快面世,一搞掂咗,有排升喎。
  今日食呢家名人茶樓好似有啲唔同,唔知是否心理作用,點心好食咗。「安仔,唔出奇呀,你估個市真係好好咩,再唔用心做好啲,取消限聚令之後,都無人幫襯,香港人醒下啦。」大家都醒晒啦,搵位又容易,夥計又好招呼,我好似去咗第二個星球,又好似進入平行時空。講開又講,中環有何好去處?去兵頭花園同大家影相,好唔好?
  「哈,我正想講中環有好多本地遊好去處,兵頭花園就是好例子。」張翁,嗰個噴水池都唔同咗樣咯,專程走去探馬騮同長臂猿呀?去嚟嘥時間。「世侄,本地遊唔係咁膚淺嘅,你知唔知兵頭花園門口有段古?」大師兄馬上搶答︰「前輩一言驚醒,門口一對石獅子仲喺度,聽講已經成精,夜晚會行出嚟同人Say Hi。」銀行偉好有興趣,問呢對獅子是否坊間傳說之香港神獸之一。
  我都無你咁好氣,飲完茶我去獅子銀行撳錢,使唔使順便同門口兩隻銅獅子,即係張大口嗰隻「史提芬」同岳高頭嗰隻「施迪」打個招呼?「安仔,本地遊要有主題,中環有好多奇談怪事,唔講你唔知,講畀你知之後,走去打卡,鍾意影張相,再鋪上你個社交網頁,幾好玩。」

不如搭程電車河

  明白,兵頭花園貼近之金鐘兵營更加精采,聽講以前係日本憲兵司令部,好多香港鬥士有入無出,得閒都要去逛逛。「咦,係咪即係行商場?」偉哥,舊時個兵營好大,周圍都有不少歷史遺迹,上網找找資料,OK?「以前有中環人話,日本皇軍陰魂不散,不時會在附近操兵,講到真嘅一樣。」好似聽過,但呢個好似唔係Selling Point,你知就嚟「九一八事變」紀念日,你講呢啲?
  「世侄,你又知唔知中環雲咸街、擺花街、威靈頓街,去到荷李活道是名副其實的花街,主要是洋人的夜生活地點?」知啦,我想過寫個網絡小說,穿越呢個時空,百幾年前,這一區是國際紅燈區,行過西環,就係正宗的本地遊,即係塘西風月。
  「係囉,中環都可以有十二少,只不過你要改一改國籍,寫一個西洋十二少同西洋如花故事,我認為幾有新鮮感。」西洋十二少會唔會係來自澳門之大少?如花是葡國籍,還是英國人好呢?不如食完個包先至慢慢度清楚個故事架構。
  今餐食得好開心,又講又食,眨下眼又要開工,天氣轉涼,不如周末去西環電車總站,搭一程直到筲箕灣又如何?當年張愛玲在香港淪陷前後,成日搭電車,遇到轟炸,走過去灣仔防空洞暫避,情景刺激之餘,又好萌萌達,真是一個經典之本地遊,約定大家,報名請早。

文:李辰安 圖:中新社
李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。

最新回應

相關新聞

熱門文章