星島日報

美國超級侄女

2020-07-21 00:00
  古語有云,虎父無犬子,但呢句嘢已經追不上潮流,o依家係︰「有幾勍嘅叔父,就有幾勍嘅侄女」,好似萬人景仰之美國總統特朗普,就係最佳之現眼報。
  「世侄,今日我帶出嚟支日本威士忌就真係勍嘞,你坐低慢慢飲,唔好喺度講人是非,因住第二日制裁埋你。」咦,講下都唔得,咁咪勍過香港嘅新法例?我無美國資產,十年去唔到美國幾次,第二日喎,我都返去粵港澳大灣區啦,我驚乜?之不過,在座都係有財有勢有地位之人,尤其是張翁,我就小心啲講嘢。
  「其實都幾發人深省,有個夠膽爆叔父醜聞之侄女已經唔簡單,佢呢個叔父仲係一國之君,你話美國幾自由民主呢?換了其他大國,你估後果如何?」我初次品嘗日本威士忌,我唔會買嚟試,因為日本威士忌價錢貴不特止,我做乜有蘇格蘭原產地之威士忌唔去飲,要飲日本威呢?係噃,聽唔清楚頭先大師兄講乜𠻹!
  張翁話︰「呢位特朗普小姐唔使驗DNA都知佢一定係特朗普家族成員,你話係咪?」我點敢答你,容乜易我第二日畀人制裁,你知啦,呢度中環好多耳目吖嘛。
  侄女話叔父細個缺乏父愛,其實即係話埋畀人知,佢父親即大總統之親兄,同樣都有童年陰影,如是者,成家人都躺槍,咁又何必呢?真係美國先有呢種民主自由。嗱,我無針對任何人,亦唔係想駁斥某人言論,純粹係個人抒發。
  「安仔,你唔使唔出聲,我都知你個心諗乜,總之,美國偉大係有原因,再次偉大都係靠晒姓特朗普之人。」講呢啲,你唔係話侄女第二日會走去選美國總統吓哇?係就要祝你偉大再偉大。
  銀行偉話飲日本威士忌最好加冰,我無研究,所以加梳打水,口味都OK啦!「辰哥,美國係個人主義,利益先至係道德最高層次,我睇《紐約時報》報道,特朗普小姐早年與家族之阿叔、姑姐打分身家官司,鬧得好不愉快,o依家吼正機會將阿叔一軍,唔係甚麼出奇之事。你知啦,呢本書一定全球暢銷,收版稅都食過世,畀你都會唔寫網絡小說,調轉頭寫你阿叔啲秘聞。」唔好咁講,我邊有福分有個咁巴閉之叔父。我同阿叔不知幾好傾,周不時落去灣仔搵佢飲茶吹水,講波經。當然,本人家族沒有遺留任何物業資產,係一家人和諧共處的原因。

搵槍手代考試

  講開又講,各位讀書時有無出貓?忽然間大家各自以不同理由離座,唔係去洗手間,就係出去搵嘢食。係,作弊唔係好光彩,不過,這是人生必經階段,又可以話做學生好難避免唔犯之過錯。其實我想講,偷睇隔籬同學考卷,又或者寫紙仔擺入褲頭之類,點算係一回事呢?你睇特朗普,直頭搵個槍手幫佢考SAT,分數高到離譜,所以入到名校沃頓商學院,先至係犀利。
  「喂,世侄,以上係一面之詞,大總統咁叻,考試一定好高分,唔會花錢請人代考如此無賴。」張翁,我無話特朗普唔叻,不過叻人一樣可以搵人代考。「啱呀,你有無睇過《南海十三郎》?江太史公考鄉試係搵人代筆,而自己走去幫人做槍手,結果一樣中榜。江太史公搵人代筆係貪得意,自己唔去考代人考,是為了幫寒門子弟取得功名。」大師兄,你真係了解特朗普,唔通佢又好似江太史公咁,貪得意,而非旨在出貓。做戲就有呢幕啫,現實都會存在?我唔係幾信。
  其實特朗普形象不嬲都花花弗弗,言行舉動都係估你唔到兼無厘頭,你點寫佢都唔會畀你破壞到形象,侄女出來爆料,有曲線宣傳叔父助選之可能。
  「辰哥,你好似寫網絡小說咁有想像力,你不如話特朗普係外星人!」哦,一早有人講過佢係去過時光隧道,更加有人話佢其實係中國人𠻹。全世界無一個國家領導人可以有特朗普如此豐富的人生色彩,好似中國咁保守落後之大國,未來一百幾十年都唔會有此奇才出現,大師兄,你話係唔係?無人回應,皆因話題轉咗去講美國股市,同人民幣升值,大家睇港股走勢亦會向好云云。你估幾時侄女本書會有中譯本?我好有期待。「安仔,你不如買原著好過啦,o依家中美關係咁差,美國分分鐘唔會批准呢本書譯成中文,更加唔會在香港發行。」係噃,我醒唔起。唉,理得咁多,今天有酒今天醉,大家飲杯!

文:李辰安 圖:法新社
李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。

最新回應

相關新聞