星島日報

海洋公園之科幻結局——辰來之筆(李辰安)

2020-05-19 00:00

  (作者李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。)
  聽講海洋公園有摺埋的可能,作為香港之子的我,不禁心情複雜,儘管今天毋須隔離,可以齊集中環酒館一聚!
  點解海洋公園都做唔住?是疫情太過厲害,抑或內地客不復再回?「係香港人唔再需要一個唔係為市民服務的主題公園。」從事與教育相關工作之鐵飯碗大師兄,如果我無理解錯誤,旅遊業係咪應該都要Ban埋呢?事關招呼外地遊客等如唔係為市民服務噃,唔通你o依家要打橫嚟講,同我拗「外地遊客唔同內地遊客」,吓哇?當然,我無咁童言無忌,去同大師兄講旅遊,人生最緊要開心,幾難得大家可以飲番杯,講呢啲?
  「安仔,上次你唔係講海洋公園,而係講英國嗰位布朗先生,發現新居有個神秘地窖,見到另一個由幾十世紀之後返過來的自己嘅故事咩?」張翁,差啲唔知你講乜,大佬呀,順口開河,唔好咁認真,不過,講開又講,布朗喺自己屋企搵到時光隧道呢個橋段幾新穎,當然,你可以應景地寫未來返回現在的布朗,原來就係全世界之零號病人,今次新冠肺炎係由佢從未來帶嚟之一次滅絕地球之大陰謀,如此這般,阿水都識將個故仔駁落去啦!
  「安仔,你話新冠病毒係未來人製造?咁同美國總統、美國國務卿之主流意見有出入,你有乜證據?」大師兄,我講網絡小說,唔係做新聞專題,更加無意涉足國際政治,不如大家講番啲正常話題!
  「係呀,唔止海洋公園慘慘,歐洲有動物園因為疫情而破產,唉,園中動物面臨糧食人道危機。」張翁宅心仁厚,憂國憂民憂動物,真的是人格高尚。「係呀,就算唔怕執笠之動物園,啲動物因為好耐無見過遊客,表現有點失常,專家話動物可能因為孤單而有心理問題。」
  哦,咁海洋公園有藉口摺埋,事關疫後都唔慌有咁多遊客入去參觀,如果要睇魚魚同大熊貓,不如睇網上直播。「辰哥,咁係咪《魚樂無窮2.0》?」偉哥,都係你有智慧,就依你意思去做。
  其實,海洋公園既然主要服務內地遊客,而內地又咁有錢,地方又大,不如放咗個海洋館畀佢哋好過,最多唔使頂手費又點話啫!「啱呀,成日話香港無土地,進步人士又話要先發展棕地唔好填海,同時又嫌內地旅客過多,摺埋海洋咪有土地囉,摺埋海洋公園唔使招呼內地遊客,咁就兩全其美。」我諗大師兄咁進步,都應該無位畀你入得到啦。
  「唔係噃,海洋公園之魚魚同熊貓地位等同香港人,點可以送去大灣區?此例一開,好唔得掂個噃。」張翁好似頂大師兄唔順,「咁都唔得?」係,海洋公園可以摺,魚魚同熊貓繼續住番喺香港仔原址,同時為了保護呢塊咁寶貴之城市土地,建議保留公眾之用,可以考慮改建中國歷史博物館、香港通識大本營。「係,總之一句,海洋公園可以摺,但係唔可以起樓!」咁魚魚同熊貓搵你養呀?雖則都算係香港居民啫,但唔好搞分化好噃!「搞乜分化呀,安仔?」大師兄,有香港「人」唔使做有得食,我做香港人就做到腰直,咁你以為公平公正咩?「辰哥,魚魚同熊貓成日都遊下遊下,咁仲唔算係做?」
  「大家飲杯先,疫情都未過得晒,又喺度嘈嘈閉閉,真係浪費光陰。」張翁有點不高興,不過,大家都係理性討論,繼續香港良好傳統,之不過,你老人家唔啱聽,大家識做,飲杯酒休息下先。
  講開又講,英國疫情已經回穩,唔知係咪同零號病人布朗先生由未來返回現在有關呢?「安仔,你不如話,因為有未來之布朗先生返來,英國o依家得知更多驚天大秘密,所以英國正加強向中國問責疫情,同時索取天價賠償。」吓,咁都得?大師兄,唔通新冠病毒係中國外星人所為?
  張翁今日話夏至已來,所以改飲啤酒,成個人都後生咗,佢讚布朗先生係好橋,不過,發生喺英國好似太離地,同香港人有點隔膜,不如搵個香港場景,改編個故仔,效果會更加好。「張翁,你唔好玩啦,香港啲新居邊有可能搵得出個地窖?我哋住宅窄到蟻竇都無一個,你估個個好似你住山上二千方呎豪宅!「一唔係就話香港海洋公園原來有個神秘地窖,好唔好?」都幾好,我想像出現一幕,藏在海洋公園之地下時光隧道忽然嚟料,渣一聲,魚魚同熊貓全部唔見晒……都幾震撼噃。
  

最新回應

熱門文章

可能感興趣的文章

深林人不知

2020-01-30 00:00:00

跳脫黑白

2020-01-23 00:00:00