李辰安 - 王百万与五亿探长｜辰来之笔

2023-02-07 00:00

储钱DIY百万富翁

今日饮茶，我问张翁，半个世纪之前，家财一百万系大概有几富贵，佢无答我，只系叫我食烧卖。

话说有位「炒散」保安员，四年储咗一百万，大家起势咁帮呢位保安大哥计数，其实用呢个时间DIY百万富翁，都算系奇迹，如果可以讲远啲，简直系大湾区奇迹啦。大师兄望实我︰「安仔，你都九唔搭八，大湾区系要香港打造成为一个国际创新中心，后生仔要有梦想，要去搞创新创业，唔系要做百万保安员俱乐部。」

我心谂，全世界都话呢个故仔励志，点解你话我九唔搭八？无你咁好气，叫笼山竹牛肉，补下铁质同钙质，老实讲，男人唔补好易老，我有朝一日退休，都想做四年保安，你知香港退休金、年金都好难够使，我担心第二日大湾区生活水准都好高，退休做多四年有一百万傍身，好似定好多。

张翁话︰「大师兄讲得啱嘅，特区成日宣扬呢种百万故仔，又话有五厘几息收，咁咪大家都打份工，创新创业搵边个做？」我都系加多个咖喱鱿鱼，几好味，虽然重口味又有味精。

当年千尺单位卖七万元

银行伟话，个个后生人都努力去搵一百万，千祈千祈唔好摆入银行收息咁唔进取，个人投资好多项目，回报更高。「讲呢啲，投资咁大风险，金管局都有损手啦，我就宁愿收息。」我忽然好奇问张翁，几十年前做王百万有几威，点知佢都费事答我，唔知系咪嫌我肤浅？「世侄，你系大学生，咁嘅

问题都要问。」系，不过，我无做大学生好耐啦，不如，问下大师兄，佢又知唔知啦。

「我一时答你唔到，不过可以上网查下，美孚新邨1968年卖六十几蚊尺，于是你可以用作指标，一千尺一个单位，你当七万银，一百万买到几多个呀？」食山竹牛肉先啦，我最怕计数，会头晕。

银行伟懒叻咁，佢话可以买十几个单位，折合依家一个单位八百万计，当年王百万，即系过亿身家，又换言之，比起今日保安员之一百万，多出一百倍，相差都几大。「饮啖茶，不过唔好食包，等阵叫碟乾炒牛河。」哗，咁肥腻，新年都食到好滞，不如食鸿图窝面，再唔系，炒个饭啦。

「世侄，今日有一亿身家其实比唔上六十年前咁富贵，你知啦，依家买部劳斯莱斯都过千万，住半山两千几尺一层楼，起码七、八千万，你仲有剩低几多钱可以消费？可能你谂下谂下，都系搵份保安散工嚟做。」世伯，唔好讲笑啦，坐劳斯莱斯住半山，要我做保安，你不如去电视台做编剧。

五亿探长身家天文数字

大师兄决定食炒饭，因为厨房大厨好好手势，唔会太多油，而且保证粒粒米都有蛋包住。「其实，我谂起码要有五亿身家先至可以同上世纪六十年代王百万相比。张翁，你话系咪？」张翁都好似唔多理睬呢个话题，只系吩咐楼面，炒饭要多葱。终于明白，有钱人唔会叫厨房加叉烧咁老土，等如唔会同你发王百万白日梦。

「世侄，上世纪六十年代系五亿探长（编按：图为《五亿探长雷洛传2》电影剧照）黄金岁月，你又计唔计到数，嗰时你有五亿身家，即系依家乜嘢水平？」我想抗议，成日都要计数，我真系会头晕。银行伟又抢答一亿乘大五百倍罗，「五百亿，咦，都唔错，你知探长系Hold Cash，唔讲得笑。」好嗱，你不如发梦今时今日做五亿探长罗。

「安仔，如果全部存入银行收五厘二五息，即系几多钱？」够啦，大家食嘢，唔好再同我讲计数。