李辰安 - 人生第一次通宵睇书｜辰来之笔

我记得人生第一次看书看通宵，日光日白还在看，不是因为考公开试，而系年少时代一个晚上，看倪匡的卫斯理系列。

「细个阿妈日哦夜哦，话我读书无咁勤力，成日挂住睇电视，点知那些年，我一口气去图书馆借咗几本卫斯理，以为可以慢慢叹，殊不知睇完一本又一本，睇到天光仲未够喉，要睇晒几本先至肯起身。」大家在中环小馆酒聚，无不对科幻小说大师倪匡作出怀念。

「安仔，我哋考入乡下大学最大收获之一，就系山顶家书院之图书馆几乎有齐卫斯理小说，同埋又有金庸小说。」大师兄就借《天龙八部》，我就专攻卫斯理，一于借到尽，尽借几本系列小说。「忠告借书要还，睇得到咁多先至好借。」银行伟好似赠我兴，不过，我原来一晚可以睇晒四、五本卫斯理，借过即刻还，然后再去借，成家图书馆有二、三十本咁多，发达罗，借几多都唔惊。

张翁就话无睇倪匡小说，事关人在中环应酬多，平时唔得闲睇小说，但系必睇倪翁主持之夜晚节目，成班才子一齐吹水，睇到好开心又兴奋。

讲下讲下已经几十年，我好记得卫斯理小说已经有平行宇宙、时空穿梭的前衞剧情，当时无得几个香港人明解呢啲科普常识，更加难以融会贯通，识创作成本土科幻小说。「卫斯理有古装武侠情节，又有现代惊栗小说元素，再加上科学思维，哗，问你如何抗拒呢种原创魅力。」

吹水要有杯酒，所以今日开咗两支白酒，好啱今日闷闷哋之天气。「系啦，你点识睇倪匡小说？」其实未读乡下大学时，中学朋友都有推荐倪翁之小说，不过，花十几蚊买嚟捧场，就超出个人预算，去公立图书馆又无咁神心，入咗乡下大学仲要派到山顶家书院，咁就好方便，行出宿舍一分钟路程就系书院图书馆，呢家馆就系收藏中文小说，一看之下，倪匡作品摆晒出嚟，咁就唔好客气啦。

张翁话留学美国有香港同学系武侠小说迷，不过佢老人家就好心散，得闲揸车呢度去嗰度去，过阳光与郊野生活，金庸经典未完全读完一套，后来都系睇电视剧，不过此时已经非少年书迷之年纪，所以感觉不是太深。「张翁，你算系番书仔啦，其实阿爷嗰辈十之八九都系武侠小说拥趸。」银行伟唔使问，一定无睇金庸、古龙、倪匡作品，事关佢洋化过张翁好多。「伟哥，你有无睇过卫斯理？」

大家讲到兴起，不经不觉两支白酒报销，好唔好换一换口味？唔好，唔好左沟右沟，再来两支。靓仔侍应碧咸仔睇波唔睇小说，所以无行过嚟凑热闹，也许，呢啲就咪叫做代沟罗。「后生仔好多系日本动漫迷，呢个潮流已经悄然改变。」碧咸仔话自己都无睇日本漫画，不过，佢好钟意去日本旅行。

银行伟话有认真睇过卫斯理之《蓝血人》，因为有美国NASA背景，讲起美国当年航天最威水时代，率先去木星，睇睇下又有中国古代历史，讲到太平天国，真系服咗大师之过人知识，以及高超之想像力。明白，银行伟系因为有美国背景先至睇得开心，伟哥真美国人也，鉴定完毕。

「安仔，你又几时戒得甩睇卫斯理？」好简单，就好似好多香港后生仔咁，借到无得再借，就唔戒唔得啦。「即系咁，成家图书馆之卫斯理畀我日吼夜吼，又加预约，睇晒嘞，便功德圆满，于是追求人生最广阔之目标，例如追女仔。」众人大笑，我马上澄清︰「我讲系转去睇王晶之追女仔电影系列。」点解唔系真系追女仔，你有追女仔困难症？「大师兄，睇王晶追女仔电影，里面有曼玉、楚红、青霞，现实生活又边有如此精采？」

张翁话我言语艺术，忽攸大家咁话，算吧啦，吹水唔抹嘴，你睇差不多又饮到第四支白酒。「不如大家歇一歇先，食下生果，休息多阵去晚饭，好唔好？」其实人生如小说，真系唔使太认真，最紧要开心，同时又无记挂。钱系搵嚟使，千祈唔好剩低，当然，以上人生哲理适用于搵过大钱之人，不是我等成世掹掹紧之流可以配用。

今晚食乜好？转转口味来一次韩国烧烤。「唔好啦，热气。」银行伟投反对票，无计，都系去中环小厨叫个冬瓜盅，一于咁话。