辰来之笔｜又要捱盆菜过年

今年又系盆菜贺年，不过，大家都感恩了，起码你可以在市面上买到几百种不同之盆菜，好多地方超级市场无嘢卖。

大家准备过年，难得晏昼可以去中环饮餐茶。「好似无乜收炉气氛，事关习惯咗与病毒共存，唔使讲咁多。」大师兄好少有如此牢骚，系唔系今年又系买即食盆菜返屋企拜年呢？张翁同大家分享私人珍藏之老火铁观音，又系上环茶庄送来的。「大家又食盆菜，旧年又食盆菜，不过，你哋唔好讲到好似大家又要捱盆菜咁啦，话晒盆菜有鲍鱼、烧味，豪华装有澳洲龙虾、日本瑶柱同冬菇，当然，有新鲜萝卜、芋头垫底，真系几好味。」

银行伟点咗个腊味煲仔饭，要等足四十五分钟，所以大家有排倾，不如要多个海鲜汤，一年又过，大家食好啲。「𠵱家食啲点心先，不过唔好点太多，是但虾饺、烧卖同粉果就得啦。」其实，我细细个都锺意食盆菜，不过，势估唔到食到有少少厌。「安仔，无计啦，大湾区都有确诊，你估可以返去中山、顺德食农家菜咁精采咩！」

上一次我去深圳食餐好之时，已经不知是何年何月，但记得系去南山高级消费区食四川菜，转个头又去光顾城中排队潮州店之卤水狮头鹅，想下想下，我好似小飞侠咁，飞去一个时空穿越的世界。

「食粉果啦，深圳无香港咁靓之手工粉果，中环呢家茶楼系数一数二，唔好谂返转头，活在当下先至有幸福。」明白，同意，张翁你老人家新年有乜愿望？「我个孙女身在美国上小学，但系已经好耐无返学，成日在家中网上学习，佢同我讲好挂念班同学。」大师兄话，香港咪一样，「想当年，我同安仔嗰个年代读小学，成日最恨打八号风球唔使返学，我哋呢种心态，相信细路仔唔会明白。」

系啦，打风最开心，成家人开罐头食饭不知几开心，点解呢，罐头有乜好食？「世侄，因为你平时好少食，少食多滋味。」系罗，如果出年大家又系食盆菜，咁又点呢？我忽然觉得人生都几无聊，吓哇！「辰哥，我朋友个女𠵱家在英国读大学一年级，佢同大家讲，点解香港咁嘅，有咁多限制，英国嗰边已经当新冠系流行性感冒，大家如常过日，好多同学仔都偷鸡唔戴口罩啦！」
无你咁好气

大师兄话，英国又点同中国香港。「好啦好啦，不如叫碟清炒豆苗，好快就有煲仔饭食。」大师兄就讲得啱，欧洲人相信抗疫要顺其自然，你知唔知，好多人认为感染咗新冠，体内就有自然抗体，好过打两针。系？有咁嘅事，伟哥你个世侄女咪好危险？好信唔信，佢特登唔戴口罩博中招，结果可以好严重。

海鲜汤先到，无问题啦，大家饮汤先，不过最紧要留番少少汤，等阵用嚟浸饭焦。「讲时讲，中国古时医学理论系平时识得调养身体，增强免疫力，一旦有疫情时可以将病情减到最轻，西方人就唔怕死，就算几百年来经历过几次瘟疫大流行，佢哋相信只系一场物竞天择之人类淘汰赛，可以留低就系物种优越，中招唔死得有一样好处，就系自身有免疫力之馀，都可以有DNA遗传畀后代。」

哗，饭盖一打开，腊味浓香四散，成个人精神晒。「张翁，我最怀念系食金银膶，鸭肝加嚿肥猪肉，简直系天作之合。」部长行过听到，佢话𠵱家好难有呢味嘢，可能返去广州老式茶楼至有供应。「有排都返唔到广州啦，世侄你唔怕肥腻，食多件腊肉当拥有。」

讲开又讲，大师兄好似上堂讲书咁话︰「几百年前，西班牙人百几人打低秘鲁印加帝国，主因唔系好打得咁简单，系西方班人自带流行病毒，当地人无免疫力，大批土人病倒，于是不战而败。」原来系咁，唔怪得之西方人相信确诊系好东西，唔病过就无咁好打。不过，今时唔同往日，𠵱家系现代城市化，人口咁密，公共医疗又如此昂贵，你唔系话当新冠无到咁话？「大家唔好研究历史，食多碗饭保下暖。」

我其实想讲，有欧美科学权威杂志发表报告，奥密克戎变种病毒有严重后遗症，将影响男性雄风，连重要器官都可能变小，唔通欧美人士无所谓？大佬，会传到后代噃！

算啦，人哋嘅事唔好理，都费事教精佢，系时候浸饭焦，食完出去散下步，无你咁好气。