辰来之笔|第三空间美少女
2021-10-12 00:00时兴第三空间概念,意指现实之外还有一个时空,我就唔知点解,不过,觉得好有想像力,最啱写新潮小说。
银行伟又来抢镜头︰「辰哥,有个哈佛美女教授挑战爱因斯坦,认为仲有另一个神秘空间和世界存在。」我大啖饮完一杯啤酒,谂下银行伟有道理,写小说最紧要有纹有路,似层层就OK,三、四、五、六维无问题,重点系科学家话喎,宇宙有一个神秘空间,咁咪得罗。
讲返之前嗰位日本美少女。故事系美少女有阴阳眼,系遗传自母亲,所以舅舅知之甚详,于是利用佢做一种好神奇之服务行业。「辰哥,你讲故仔都几曲折离奇,日本美少女被舅舅安排做边种行业?」不忙,先来多一杯啤酒好唔好?
我真系服咗日本人之编剧技巧,阴阳眼呢条桥好旧,旧到无人肯再用啦,偏偏就有新意思,要写大大个服字。「边种行业,你唔好想多咗,呢一个系创新嘅服务行业。」美少女有阴阳眼,能见到灵界之物,还可以与之沟通,于是佢可以去凶宅做打扫工作。「即系点呀,辰哥?」好简单,舅舅安排美少女入凶宅住几日,宅内之冤魂好自然会现身同美少女沟通,把前世未圆之事拜托对方完成,然之后便安心离开,凶宅咪就无鬼啦。
「呢位舅舅就系咁利用美少女去帮佢赚钱,美少女因此而结识不少异灵好朋友,帮佢哋解决问题,又或者帮手解决冤情命案,于是构成一本城市新潮聊斋故事。」大家似乎对以上题材好有兴趣,张翁首先提供香港故事。「上环系十二少同如花故事之发源地,其实呢一区流传好多上世纪二十年代哀怨纠缠之异灵故事,梅姐同哥哥合演嗰套戏就系经典。」对啦,不如张翁你扮万梓良个角色,同如花穿越相遇。「安仔,你真系九唔搭八,如此炒冷饭之桥段,点见得人?你仲要张翁扮剧中人。」讲笑而已,系都叫张翁扮十二少啦。
唔好扯到咁远,我想讲番创作。嗱,之前讲乜嘢乜嘢第三空间,我哋唔好再讲阴阳眼啦,你就话日本美少女原来系第三空间之人物,所以能出能入不同界别,咁系咪新鲜好多。「世侄,你有想像力,第三空间系科学界最神奇未解之现象,写起小说嚟,好似好有科学根据。」
大家马上起草了一个《第三空间美少女》系列之故事大纲,不过,美少女去做凶宅打扫行业,好似唔多够劲。「不如就学英叔之僵尸道士系列,咁就得啦!」我好难想像把英叔之角色,代入一位穿水手服之第三空间美少女身上,究竟会出现如何神怪离奇之景象,不过,都可以试下创作嘅。
为咗鼓励大家集体创作,张翁请大家来一瓶葡萄牙鸡尾酒Sangria,好,非常好!「话时话,第三空间可以话系通阴阳界限之人,三十年前有英叔道长,今时今日咪就系开心少女鬼?」乜鬼啫,人呢㗎,可以穿梭不同维度之特异奇人。「安仔,你谂到故仔未?」我就想番起细个时去秀茂坪,陪阿婆一个同乡亲戚去搵问米婆之经历。
「辰哥,美少女最紧要新潮时尚,唔好谂番转头去罗兰姨个神婆形象,如果咁样发展,相信吸引唔到年轻人。」好,我就用日本美少女嗰个景场去幻想,但佢系有英叔之道士特异功能。「世侄,唔好谂来谂去都咁传统,呢位美少女系一个小小科学家,好熟爱因斯坦『相对论』,又识得用量子力学武器,例如用量子纠缠玩瞬间移动,分身去第二个时空,用量子枪去击破敌人。」
哗,饮得几杯,再加埋大家一轮嘴咁讲,我真系脑震荡,等等先,好多科学情节,我一时未能消化,大家可不可以简单啲呢?我原先讲嗰个日本故事边有咁复杂,大家返番去倪淑君套《阴阳界》算啦!「喂,你又话第三空间美少女嘅?」无你咁好气……
文:李辰安
關鍵字
最新回应