星岛日报

新冠本地游

2020-09-15 00:00
  终于等到可以四人一枱坐,是日与中环酒友到名人茶楼午饭,大家好似几十年无见面一样,太多话题了。 
  大师兄问我,有乜本地游好介绍,我话行山原本系好提议,不过,人满为患,想泊车好难搵到位,坐巴士就唔好预我啦。「世侄,中环都有好多本地景点,使乜坐公共运输工具。」唔好玩啦,张翁,你叫我行「孙中山史迹径」呀?我又唔系内地同胞,行完之后排队食牛腩面咩?无兴趣。
  银行伟近日埋首研究科技股,睇佢脸色红润,精神抖擞,成个有运行咁样,吃虾饺都有型过人,于是请教佢有无好介绍,畀个冧把大家,点知佢话不如讲下香港本地游好过。
  「辰哥,科技股有乜好讲,尤其是神州科技公司,只要嚟香港上市你就去抽新股,起码一两个Dup,讲多浪费时间。」系无?呢铺阿爷唔玩自由行帮香港,改为全民炒股发达,边有咁大只蛤乸随街跳?「你又唔好咁讲,你都无记性,十几年前,我哋有几个师弟,毕业无去搵工,净系抽新股,已经发咗达。」系,抽完新股有首期上车,然后细楼换大楼,一间变几间,发到三十五岁就退休吖嘛,师Ching,历史可以重演,唔怪知得香港有咁多人以为今时今日可以做孙中山。
  「辰兄,中国历史我唔晓,请问孙中山先生当年有落嚟香港炒股炒楼?我真系乡里罗。」我望下银行伟,佢唔似窒我,佢系真无知,算啦,无谓教精佢。「伟仔,楼市你又点睇?跌紧噃,有无得谂?」张翁,香港楼更加稳阵过科技股,你睇今次新冠疫情恶过之前「沙士」,楼市依然纹风不动,新冠疫苗就快面世,一搞掂咗,有排升喎。
  今日食呢家名人茶楼好似有啲唔同,唔知是否心理作用,点心好食咗。「安仔,唔出奇呀,你估个市真系好好咩,再唔用心做好啲,取消限聚令之后,都无人帮衬,香港人醒下啦。」大家都醒晒啦,搵位又容易,夥计又好招呼,我好似去咗第二个星球,又好似进入平行时空。讲开又讲,中环有何好去处?去兵头花园同大家影相,好唔好?
  「哈,我正想讲中环有好多本地游好去处,兵头花园就是好例子。」张翁,嗰个喷水池都唔同咗样咯,专程走去探马骝同长臂猿呀?去嚟嘥时间。「世侄,本地游唔系咁肤浅嘅,你知唔知兵头花园门口有段古?」大师兄马上抢答︰「前辈一言惊醒,门口一对石狮子仲喺度,听讲已经成精,夜晚会行出嚟同人Say Hi。」银行伟好有兴趣,问呢对狮子是否坊间传说之香港神兽之一。
  我都无你咁好气,饮完茶我去狮子银行揿钱,使唔使顺便同门口两只铜狮子,即系张大口嗰只「史提芬」同岳高头嗰只「施迪」打个招呼?「安仔,本地游要有主题,中环有好多奇谈怪事,唔讲你唔知,讲畀你知之后,走去打卡,锺意影张相,再铺上你个社交网页,几好玩。」

不如搭程电车河

  明白,兵头花园贴近之金钟兵营更加精采,听讲以前系日本宪兵司令部,好多香港斗士有入无出,得闲都要去逛逛。「咦,系咪即系行商场?」伟哥,旧时个兵营好大,周围都有不少历史遗迹,上网找找资料,OK?「以前有中环人话,日本皇军阴魂不散,不时会在附近操兵,讲到真嘅一样。」好似听过,但呢个好似唔系Selling Point,你知就嚟「九一八事变」纪念日,你讲呢啲?
  「世侄,你又知唔知中环云咸街、摆花街、威灵顿街,去到荷李活道是名副其实的花街,主要是洋人的夜生活地点?」知啦,我想过写个网络小说,穿越呢个时空,百几年前,这一区是国际红灯区,行过西环,就系正宗的本地游,即系塘西风月。
  「系罗,中环都可以有十二少,只不过你要改一改国籍,写一个西洋十二少同西洋如花故事,我认为几有新鲜感。」西洋十二少会唔会系来自澳门之大少?如花是葡国籍,还是英国人好呢?不如食完个包先至慢慢度清楚个故事架构。
  今餐食得好开心,又讲又食,眨下眼又要开工,天气转凉,不如周末去西环电车总站,搭一程直到筲箕湾又如何?当年张爱玲在香港沦陷前后,成日搭电车,遇到轰炸,走过去湾仔防空洞暂避,情景刺激之馀,又好萌萌达,真是一个经典之本地游,约定大家,报名请早。

文:李辰安 图:中新社
李辰安,从事创作二十年,开拓城市感觉派文风,与读者一起怀旧,穿越香港时空找寻生活新旨情。

最新回应

相關新聞

热门文章