独家丨直击韩马利闹爆林夏薇生仔冇屎忽周嘉洛被幕后整到婉拒对方道歉

2022-11-22 08:00

TVB日前举行下年节目巡礼，晒冷式节目介绍梗有一套啱你心水，当中最厉害27岁力捧小生周嘉洛，一人孭三套剧，计比例多过好多视帝，虽然极速上位中，但周小生无话招招积积，依旧同工作人员打成一片。日前，周小生同林夏薇喺西贡为《宠爱Pet Pet》拍外景，见佢玩鬼工作人员，唔使埋位就坐石壆髀擘擘，好似隔离屋啲哥哥咁，咁鬼亲民，抵佢有运行嘅。采访:金泰亨

介绍剧中角色，男女主角及小贩韩马利。

周嘉洛在《痞子殿下》首任主角，《痞子殿下2》成为下年重头剧。

周嘉洛在剧中饰演宠物传心师汪声仁，林夏薇饰演兽医。

周嘉洛与游嘉欣都是TVB力捧的对象。

周嘉洛及游嘉欣出席剧集《罗密欧与祝英台》拜神仪式。

周嘉洛下年被TVB委以重任，孭飞剧集计有《宠爱Pet Pet》、《罗密欧与祝英台》及《痞子殿下2》，因为形象健康又入屋，有指佢系马国明接班人，咁佢精灵过马明嘅，希望佢唔会好似马生咁要等咁多年先拎视帝啦。

韩马利闹到成条街都听到
讲返探班，当日星期日，阳光普照仲几热添，周嘉洛、林夏薇、韩马利及杨证华在旧墟附近拍外景，剧情讲述小贩韩马利疑似呃钱，周嘉洛同林夏薇去理论，但换来喝骂，「你两个虾一个，生仔冇屎忽㗎。」男方疑似想息事宁人被林夏薇叫停，称唔可以助长骗徒，韩马利即刻爆Seed，「你够胆讲多次?」记者都吓一吓，然后杨证桦现身做正义嘅事，指证对方呃人又阻街，仲话报警添。

韩马利好恶咁凶周嘉乐同林夏薇。

杨证桦现身加入指证小贩呃人。

当日街坊话杨证桦好熟口面。

等ROLL机时林夏薇玩公仔。

因为演员表现好，两take收货，然后再等拍另一场口。等候期间，周嘉洛同林夏薇都几好倾，又互相推吓，仲帮手执好地摊啲公仔。有工作人员掉沙包落地，因为掉正周嘉洛身边所以讲咗句Sorry，换嚟周嘉洛讲笑式无情应对，「傻啦，你乜都冇做到已经讲Sorry喇，我嬲你㗎。」之后仲好随意咁坐喺石壆等埋位，性格相当OK喎。