独家丨黄夏蕙唔担心一去不返:拜拜香港有缘再会坐小轮游维港爆移民原因

2022-07-22 02:00

「头炷香KOL」黄夏蕙(夏蕙BB)将于下月11日随老伴潘炳烈移民美国，跟家人共享天伦之乐。临别秋波，夏蕙BB带《头条日报》记者坐天星小轮重拾当年回忆。一脸不舍的夏蕙BB全程表现感触：「呢几十年间，香港呢个『东方之珠』带畀我嘅幸福生活，拜拜喇，有缘再会！」离别前，她寄语香港人要努力加油，保持身体健康，明天会更好。采访：方骞平摄影：沈健程

夏蕙BB向港人挥手讲再见，并澄清只系89岁，未到9字头。

黄夏蕙大赞香港好值得留恋。

当日黄夏蕙身穿黑色短裙仔，脚踏松糕鞋喺天星码头周围行搵位影相，表现活跃完全唔似91岁嘅老人家。夏蕙BB指各大传媒都「炒晒车」，她透过本报作出「澄清」：「我系1933年香港出生，肖鸡，𠵱家只系89岁。」

夏蕙BB喺天星码头周围行搵位影相。

如同巨星出巡受欢迎

可能日前出Po宣布快将离港，当日夏蕙BB所到之处，均深受大人细路欢迎，如同巨星出巡，途人均叮嘱她要保重，𠱁得夏蕙BB不知几欢喜，有求必应玩selfie，仲叫人违规除口罩影相会好睇啲。见到途人影嘅相好靓，夏蕙BB更大方畀电话号码途人用作回图。唔少人话「锺意佢靓」、「唔舍得冇咗佢上头炷香」、途人谢先生更上前同BB抱抱说：「我锺意佢够亲切。」

黄夏蕙深受大人细路欢迎，个个埋身求合照。

夏蕙BB所到之处都被围，个个举手机同佢影相。

男途人谢先生跟夏蕙BB情深拥抱，表示有缘再会。

以往大年初一凌晨，黄夏蕙都悉心打扮去黄大仙祠上头炷香，是著名的「头炷香KOL」。

之后BB就行去帮衬软雪糕车，品尝人生第一杯及离港前最后一杯嘅软雪糕，雪糕车哥哥用心为她炮制一杯「完美6圈半雪糕」，更表示夏蕙BB带咗好多欢乐畀香港人，「真系唔舍得你呀。」舔著融化中嘅雪糕，夏蕙BB个心亦被融化：「杯雪糕好靓、好好食、好细腻。」

雪糕车哥哥为黄夏蕙炮制一杯「完美6圈半雪糕」。

遗憾创立老人院受阻

黄夏蕙好爱香港但坚持要走：「屋企四代同堂，要返去见吓啲曾孙，唔知适唔适应新生活㗎！Plan咗先去登台9个月，再环游世界relax吓，开心咪留耐啲罗。」在旁嘅经理人Simon踢爆BB适应力低，最长一次去咗美国4个月就喊住要走。

黄夏蕙跟胡百全育有7名子女。有么女胡云妮（右二）、长女胡莲娜（右三）、长子胡礼贤（左二）、么子胡礼智（左一）、黄夏蕙（前排左一）及胡百全（前排中）。

夏蕙BB跟香港前「车神」老公潘炳烈系恩爱夫妻。

问到BB点解要走?她爆出一直收埋喺心嘅必走理由：「睇见几十年嘅老友洪金梅(祥嫂)、邓碧云、凤凰女、李香琴、谭炳文、司徒关佩英等陆续离开，身边冇晒真正知己，得返自己一个好惨，感觉好孤独想行开吓，但我唔会因为咁样厌世，反而更珍惜短暂嘅生命做啲嘢去帮人，自己好幸福，不过有好多老人家冇钱入住老人院，流离失所…最遗憾受疫情影响，名下慈善基金创立老人院计划受阻，离港后要交由契仔接手处理。」