独家丨霍启刚买白酒芝士Salami玩惊喜 老婆40岁生日抱埋大女拣首饰

2012年，被封为「最贴地富二代」的霍启刚(Kenneth)娶咗「跳水皇后」郭晶晶，婚后晶晶诞下一仔两女，一家五口好幸福。上周五系霍太40岁牛一，翌日霍生已经上载同老婆贺寿「食好西」嘅相到IG，因为两人打扮朴素，又简单食餐饭庆祝，冇炫富行为获网民一致赞好。其实Kenneth同老婆庆生点只食餐饭咁简单。上周四重阳节，本报就直击霍启刚抱埋4岁大女霍中妍去超市买白酒、芝士、Salami等及买首饰，明显为翌日生日的老婆制造惊喜。采访:张咏森

霍启刚果然不负「最贴地富二代」称号， 在IG贴同老婆食生日饭嘅相，对老婆讲︰「不经不觉第18次给你过生日，祝你生日快乐、永远18岁！」hashtag系简单幸福、生日快乐、老夫少妻同霍太，其实Kenneth都只系42岁，摆明用老夫少妻嚟氹老婆笑。

大女好活泼
霍启刚好锡老婆，亦愿意花时间去氹老婆。上周四傍晚，霍启刚同大女去咗中环太子大厦超市买嘢，因为公众假期关系非常多人，但两父女都冇唔耐烦，先去拣白酒然后芝士、Salami、果仁同薯片等，拣好就放落囡囡推紧嘅迷仔版手推车入面，着住橙色花裙仔嘅中妍好得意，推住车仔跟实爸爸行，仲帮手将食物放上收银枱，半个钟买完餐前小食同酒就离开。

齐试鱼子酱
两父女之后去咗睇翻糖蛋糕，由于无现货拎完咭片就去睇鱼子酱，因为有试食，霍启刚即抱起囡囡一齐试。 之后两人去咗睇精品，兜咗一阵就转去名模蒋怡老公开设的珠宝首饰店。两父女一齐拣礼物送畀郭晶晶，见中妍望住啲闪令令首饰入晒神，店员拎咗啲手鍊畀Kenneth睇，唔知最后买咗咩，但见Kenneth有签单，相信郭晶晶收到老公同囡囡一齐拣嘅礼物必定好甜。