【独家】大赞Do姐够洒脱最有型 黎芷珊欣赏志伟令公司有士气
2021-07-15 22:50 
近期TVB嘅访谈节目《单对单》，由黎芷珊访问因为唔同原因处于单身状态嘅嘉宾，节目中陈秀珠、黄日华、高海宁爆喊，赚人热泪！曾获「最佳节目主持」的黎芷珊再被赞赏，她谦称自己都单身咗9年，好有经历同感受去Share！至于众多单身女性中，芷珊大赞Do姐我行我素最有型！采访：方骞平 摄影：梁志明 场地：THE STADIUM@观塘
9年前黎芷珊凭首个访谈节目《最佳男主角》，访问旧男友郑伊健、梁朝伟及刘德华等成为焦点，而《单对单》亦深受观众喜爱，当中黄日华说到丧偶痛处，大男人都不禁眼湿湿；陈秀珠讲起做单亲妈妈嘅重担及高海宁谈到人生遗憾事同样爆喊。
曾搵李佳芯被拒
黎芷珊坦承要搵啲冇掩饰嘅嘉宾，所以个个都真性情、肯讲嘢，加上她亦系单身，倾起嚟就更有共鸣：「唔止华哥嗰集好感人，米记(米雪)一直都好乐观嚟面对另一半患重病，唔觉得咁惨都好有启发性。」原来芷珊曾搵过李佳芯(Ali)及郑裕玲都被拒：「唔系个个想喺镜头前讲自己嘅嘢，呢啲冇得迫，我私下同Do姐有交流，近年佢开朗咗好多，不时煲剧讲追星，佢算多情，不过我换画速度快过佢，呢期佢迷姜涛；我就锺意内地『小鲜肉』肖战！其实单身女性唔系外间认定嘅卖剩蔗冇人要，只系有唔同原因保持单身，好似Do姐咁enjoy单身，唔使同另一半交待，做锺意做嘅嘢，摆明锺意姜涛又点呀？几洒脱几型呀！」另外，她又指𠵱家公司多咗唔同类型节目，大家士气大增，副总曾志伟仲落手落脚，成日鞭策她度啲新节目。
最新回应