【独家】 睇好叶巧琳夺《造星III》冠军 顾定轩10强止步铁证冇造马

全城追睇热爆的《全民造星III》，本周参赛者进入20强杀入10强个人对决，首位被淘汰的参赛者是知名度同人气同样高企的顾定轩（Zeno），不过输畀被喻为「最强对手」的叶巧琳（Mischa）绝对是虽败犹荣，网民纷纷帮Zeno打气。Zeno同《头条日报》讲输得心甘命抵，自认私心的他睇好Mischa夺冠，更笑指总决赛会拉埋Banner帮对方打气。Zeno呢期确实好红，除咗《造星III》仲有孭飞剧集《男排女将》表现突出，因两个节目同时间推出，即触动网民神经认为他入围《造星III》有造马之嫌，习惯对负评照单全收的Zeno，呢次坚唔开心，「真系冇谂过人哋会咁谂，我系靠其他先可以做到。」他认为今次被foul正好替他平反，剥咗网民棚牙。撰文：杜淑霞 摄影：李维隆　发型：Faust@ the attic　化妆：mon　场地：夕拾x闲社

对于《造星III》10强最后对决，Zeno坦承最不想面对的对手就是Mischa，并非对方实力强，因自演出《给十年后的我》大家认识加深，「知道对方好多秘密，所以当我哋抽到对方嘅时候，即刻望住对方，已经想喊，我好唔想对佢啦！我觉得佢系最值得入十强，虽然我唔系想认输，但系我佢入围嘅话，佢可以行到去最后，我宁愿自己帮佢行上去。」



Zeno认为唯有输畀Mischa才会心甘命抵，「因为佢已经系星，佢更加应该要畀大家见到，我自己一个更加全面嘅星，但系仲有好远嘅路，我觉得佢系时候啦！因为佢真系好多年，佢话当畀自己最后一次机会，我觉得系呢一次啦！呢个世界唔好咁样对待佢啦！佢嘅歌同音乐系应该畀大家知道多啲。（带埋你嘅精神攞冠军？）我希望系，大家都知我私心佢。(佢知唔知？）佢知，我好直白同佢讲，你要赢番嚟！（示爱？）唔会，佢已经有个好好嘅对象，我冇机会啦！哈哈！」

望拜「爸爸」「妈妈」为师

演出机会多和知名度高的Zeno，参赛以来一直被质疑目的，他坦承一直都有睇大家留言及负评，「大家都系好中肯，网民冇需要去避忌同包装，系最真实，呢啲就系我要知道，我有追post，知道吓大家点睇我嘅表演。」不过当中都有令Zeno感不快评语，「系大家觉得我系造马，因为我有剧集上紧，我已经有一定嘅知名度，我先可以留低。我真系冇谂过人哋会咁谂，系靠其他先可以做到呢一刻嘅我，不过我消化完呢类型comment又成长咗，终归都系你做得唔够好，如果你做得好，人哋唔会咁讲。」现在Zeno十强止步正好平反没造马，「都系，同埋过程入面你知道唔系㗎嘛！由知名度先可以入嚟，后尾大家好似见到我有进步，有啲好嘅comment。」



现在Zeno睇番觉得《造星III》好似跟《男排女将》有种特别关连，「好似两样有interaction，睇『阿King』（他饰演角色）又好似系《造星》嘅我，去追梦同埋突破嘅我，剧入面唔系条件好有天分嘅运动员，某程度《造星》嘅我都系。」完成了《造星III》后，直言已断六亲的Zeno，会争取时间陪伴家人，特别是头号铁粉嫲嫲，之后他仲想继续进修戏剧和唱歌，「阿祖（梁祖尧）唔介意想再跟佢学戏，继续上佢堂，同埋继续食佢煮嘅饭，妈妈（阿祖）佢真系超级好，我哋好幸福，爸爸（二汶）就系心灵上嘅辅导同鼓励。喺音乐上可唔可以跟二汶学，二汶得唔得闲？收唔收徒弟？」后期A组的参赛者对于林二汶和梁祖尧照顾得无微不致，早已改口称他们为「爸爸」和「妈妈」，问到Zeno系咪当两人为师傅，他更大胆话：「系呀！唔走㗎啦！除非佢哋遗弃我哋，唔好弃养呀，领养不弃养㗎嘛！」