【独家】处男个唱随时三度改期 雷有辉好乐观仍照常彩排

喺疫情下，太极乐队主音雷有辉（Patrick）举行嘅处男演唱会一波三折，由最初8月15日开骚顺延到10月，跟住押后到12月19及20日。由于第4波疫情严峻，限聚令又再收紧，演出再有变数，Pat哥听从老板安排平静面对：「主办单位好坚持show must go on，只不过系迟早嘅事。」采访：方骞平

雷有辉于戏曲中心举行嘅两场《Pat Music Over Rainbow》音乐会，由今年8月等到12月，个期改了又改，去到11月中谂住「望见家乡」开心到癫，特登带《头条日报》记者喺场馆接受访问，当时Patrick好开心：「终于开啦，好嘢！好开心，因为多咗几个月时间畀我做预备，畀空间我磨练同埋优化吓歌单、仲有成个人嘅状态。」

希望港人多留家抗疫
Pat哥承认演唱会由8月改到10月时的确好失落，心情如坐过山车：「因为嗰时觉得状态最高峯，到10月演唱会第二次改期反而习惯咗唔太失落，都要为大家健康著想，因为疫症真系未离开，但我相信好似演唱会主题一样，雨后先会出现彩虹嘛。」可惜计划不似预期，个唱有机会第3次改期。他语带平静说：「呢刻有小小未知之数，但会照常彩排。收紧限聚令去到呢个月16号，个show可以赶得切嘅，我啱啱路过尖东海旁，望紧香港好好嘅海景，心谂『有两个星期时间畀大家抗疫，如果大家遵守呢个防疫措施，多啲留家，咁就唔会受到感染，两周后就可以嚟睇我演唱会喇，希望大家乖乖哋啦。』」被指创咗改演唱会期最多歌手纪录，他无奈笑说：「呢啲纪录真系多谢晒喇，希望有人破咗佢，我都唔想再改(期)喇！」