【独家】庄韵澄赞破产老公 有畀家用靠得住 闪嫁全因社运遇催泪烟被拖实

曾经因为前度张致恒多次偷食，Hurt到几乎想跳楼嘅庄韵澄（Xenia，前名庄端儿），于上月12日闪嫁拍拖仅两个月嘅经理人吕成忠(Joe)，变身幸福人妻。对于老公被踢爆欠债累累兼破咗产，庄韵澄力撑老公靠得住：「佢叫我放心，承诺等佢处理好之后，会好好照顾我，我信佢会翻到身。」采访：方骞平 摄影：谭壹致 化妆、服装、场地：Aplus make up & stylist

庄韵澄改咗名后，真系好运齐来，Dry足四年终于搵到真爱，换上deep V喷血晚装的庄韵澄接受《头条日报》访问时感受特别深：「喺工作上合作咗年几，直至今年4月佢先对我表白，9月开始发展。」Xenia表示她一路拖，并用工作繁忙而推搪3次，「为咗想睇清楚呢个人，每次都话迟啲先啦，难得阿Joe每次都肯耐心等候。」

因为安全感而放心一齐

观察期间，庄韵澄会表露自己最差一面，如发脾气，会好野蛮及唔化妆。但因为对方一次表现令Xenia好感动，即时心软。「发生喺去年社运其间，佢真系好紧张我，觉得一个女仔喺出面做嘢会好危险，成日话『不如我嚟车你啦！就算喺条街有乜事，都系喺我架车啫，唔系你架车。』有次街头真系遇上催泪弹，佢紧张到捉住我，好惊我会有乜意外，同平时认识嘅佢好唔同。」Xenia强调当时同佢唔系好熟，只系一齐做嘢，关系暧暧昧昧，「所以当时心谂『真系咁紧张咩？呢个男仔几有责任感喎！至少有事时唔会掉低你走咗去先！』以前真系遇过呢类人，原来身边有一个好惊你会受伤嘅人真系好有安全感，都想同呢个人拍拖罗，而且佢唔会口花花，个人好闷好内敛，咁就唔担心会出轨。」

财政独立拒帮老公还钱
对于老公被爆破产，Xenia直认一早知。「合作时都知道佢破产，为乜破产就不便提，但我同老公财政独立，佢还钱系佢嘅事，我系唔会帮佢还嘅，但佢嘅钱系我嘅钱，我嘅钱系我嘅钱，所以佢好惨㗎，啲钱全部落晒我袋，同埋佢喺呢个环境，每个月都有畀家用我，系个负责任嘅男人，到现时为止喺财政上我都未操心过。」至于前度张致恒老婆雯雯反撃庄韵澄数佢老公，不满表示：「唔使提醒我老公系一个咩人！」庄韵澄笑言：「有啲嘢发生咗就发生咗，佢哋开心咪得罗，我谂佢哋相处咗咁耐，唔会唔知对方系咩人，当然佢好爱老公先至会咁讲啦，比着我都会咁做。」