【独家】同谭玉瑛星马外景取消 李家鼎呻拍《阿爷》煮到手软
2020-11-25 23:22 
由李家鼎（鼎爷）和谭玉瑛（阿谭）主持的《阿爷厨房》近日来到第五辑，两位拍档本来今辑将会出埠到星马拍摄外景，但因疫情影响不能成行，只能留港拍摄，鼎爷大呻因而要煮多好多味餸，直言煮到手软，好彩同阿谭拍摄好有花火。阿谭大赞鼎爷能够拍极都有货，餸菜永冇重复，除了天份，还有他好学不倦的性格，而她更踢爆厨艺了得的鼎爷，最爱竟然是食饭。采访：杜淑霞
鼎爷透露，原先节目计划到外地拍摄，因疫情令计划被迫取消，「主力香港拍辛苦好多，原本我哋喺新加坡再过马来西亚，可能去埋泰国，但万一有工作人员濑嘢点算呀！？同埋大环境预计唔到，不过，出去拍真系写意好多，𠵱家喺厂时间耐咗，讲多咗嘢之外，每集都要煮多个餸先搞得掂，真系煮到手软㗎！」
同事羡慕笋工
鼎爷觉得幸好同阿谭拍档好有火花，「做节目唔可以死咕咕，要有啲生气，所以我哋成日顶咀。」阿谭笑言这份工作是笋工，好多同事都好羡慕，「返亲工都有人见到我咁讲，因为我每次着住呢套衫，代表我又入嚟食好嘢嘛！佢哋通常话好羡慕你咁多好嘢食，仲要喺街食唔到㗎嘛！」最难得节目已拍到第五辑，但鼎爷的菜式从不重复，他解释团队有份度，「佢哋会问好似有个咁嘅餸，你识唔识？我就会醒起番。」阿谭补充：「同埋同一个食材，佢都会研究好多唔同整法，又会睇番人哋食完反应去改良，所以可以源源不绝。」
跟了鼎爷多时，阿谭承认厨艺确实有进步，「我最叻整咸鱼煎肉饼，我不嬲都好锺意食，跟佢学咗知道啲肉系要加啲水落去先至滑嘅。」阿谭食得多鼎爷手势，但暂时对方未试过她厨艺，「我整过羊架畀佢食，但佢怕羊肉嘅膻味唔肯食，同埋佢其实最锺意食饭㗎！」鼎爷就解释：「睇住人哋食我整嘅嘢已经好满足，唔使点畀餸我都得。」
最新回应