【回春】IG晒性感黑丝美腿李司棋被赞人比花娇唔似「登七」

2020-10-16 09:30

啱啱「登七」嘅李司棋对黑丝情有独锺，经常潮着黑网袜，试过分享疫情下生活日常，着住黑丝嘅司棋姐坐喺沙发上摆动双脚兼扭动脚趾，好搞笑，相当有少女心。日前司棋姐上载一张同兰花合照相，留言「朋友送的胡姬花，放了个多星期依然盛放，襟摆，襟睇！」相中托住香腮嘅司棋姐神采飞扬，加埋甜美笑容同埋白嫩皮肤，星味依旧，系保鲜完美示范。最搞鬼系，着住黑网丝袜嘅司棋姐唔经唔觉晒到滑腿，美腿比身后盘花具吸引力，好抢Fo。

网民亦错焦点，唔再留意胡姬花，纷纷被司棋姐双脚吸引住，留言「你对黑丝袜呢……！超吸睛呀！」、「表情好有少女feel！Oh！Sorry！胡姬花靓极都被比下！」、「太美！」、「看到你还是好像30-40岁年。」黄建东也赞「Wow性感黑丝美腿！」、陈婉婷话「人比花娇！」对于被赞回春，司棋姐接受头条访问时笑说：「咪笑我，怎可能！」

另外，疫情下嘅司棋姐偷得浮生半日闲，昨日随朋友游艇去咗大澳一天游，鬼咁开心周围影相打卡，又买土产虾酱：「不过天气好热，晒到不得了。」