【台湾隔离】开live唔讲嘢晒chok样花姐寸姜涛：隔离几日连嘢都唔识讲？

2020-07-20 11:00

新冠肺炎肆虐，人气王姜涛及MIRROR成员Stanley（邱士缙）上周四（16日）出发去咗台湾拍偶像剧，两人抵台后，喺酒店分开自我隔离14天后才正式入剧组。闷爆嘅姜涛日前无聊影吓酒店房间张双人大床，须根等，虽然咁样都可以畀姜糖「顶」住先，但大部份姜糖都想睇多啲，唔系几肯收货！而且冇见几日姜B，姜糖真系人都癫。

昨晚day 4姜涛终于现身，并玩突然开live，15分钟直播中，戴住黑色口罩，着住黑色卫衣嘅姜涛开住音乐，坐喺书枱前睇剧本做功课，但仍然不忘拨头发，chok住对镜头，睇fans回应等，最后他还应粉丝要求，影吓住紧间房系点，又送上一双笑眼及拜拜手势，就算冇出过一句声，仍然2000多人睇他唔讲嘢直播。

唔少Fans留言话姜涛就算唔出声，但望住个镜头都似女友视觉咁喎，所以就算唔出声都好鬼正，无声胜有声，亦有指可以静静地陪伴你好幸福，miss you等。最搞笑系经理人花姐及MIRROR队友留言寸爆他，花姐说：「老姜，你闷死未？隔离几日，连嘢都唔识讲？」Edan指他扮文青：「乜隔离唔讲得嘢㗎咩？」花姐忍唔住插口说：「Edan…你都要去隔离...学习静啲。」Anson就叫他：「please say something.」队友同花姐你一句我一句唱和，完全冇欣赏过姜涛嘅chok样呢！