【独家】MIRROR拍新歌MV花姐被插偏心 姜涛话心照唔使安慰队友

相隔7个月，男子组合MIRROR终于推出新作《IGNITED》，不过，「Too Hot To Handle Version」MV被网民认为经理人兼MV导演花姐大细超，偏心爱将姜涛、Ian和Anson Lo到出面。喺花姐点名下，被指系陪衬品之一嘅Alton挺身拆解：「我就系特登唔回应，因为即将有第二个版本，咁样反弹会好大。」采访：方骞平 摄影：谭壹致 形象：Felix Wong、Daniel Chu 服装：Mastermind、MYND、D-MOP 发型：Lydia Yung、Denny Ku、Man@ Chic Private I Salon 化妆：Circle、Rainbow、Mayling @Annie G. Chan Centre 场地：香港九龙贝尔特酒店

花姐出心出力为MIRROR，但Fans总有意见。正如新歌《IGNITED》被轰歌词露骨，不符合MIRROR阳光形象；又指MV的镜头分配唔平均，Edan、Alton、Tiger、Frankie及Lokman几乎冇影！队长Lokman及Anson Kong奉命出嚟解说，队长说：「因为一首歌要分畀12个人真系唔容易嘅，同埋大家嘅风格都唔同。至于歌词系咪好露骨？每人get嘅意思都唔同，就会有好多唔同幻想。」而由头带到尾，做晒主角的姜涛唔敢插嘴，被追问才轻描淡写说：「都系为咗效果，冇谂过边个多，边个少，而且排舞时间都好紧逼，大家冇咁嘅时间去多谂。(要唔要安慰吓队友？)不嬲都唔会有呢个担心，因为我哋出道两年，一直都有呢啲问题，但系我哋都惯咗，唔觉得会伤害彼此感情。」

劝Fans勿鼓噪
Edan及Alton被花姐点名向记者解答误会，前者面红耳赤，耍手拧头说：「冇冇冇难受！可能唱少啲，但跳舞会多返啲，而且有另一个Version，会相辅相成嘅。明白歌迷都系好担心我哋，或者叫乜嘢心切？」AK抢答：「爱之深，责之切。」Edan愈讲愈乱：「唔系呢个，算喇！唔好抛书包，佢哋好紧张我哋，原意都为我哋好，但唔使太担心，因为会有另一个Version。」相对Alton轻松回应：「今次几锺意个MV，因为拍摄时花姐提我哋要开心啲！甚至推我出去，话要Alton嗰个样呀，因为我个人好善良，就系好kind咁嘅样罗！」