【头条独家】苏格兰人唔愿戴口罩 乔宝宝灰爆大呻迟早濑嘢

乔宝宝喺3月底离港前做过义工，派口罩畀弱势社群，移民苏格兰与家人团聚后，宝宝仍然热心公益，之前他为当地华人社区派口罩，半小时内派出3000个，但排队人龙中只得头尾两个系外藉人士，好多英国人仍然唔愿戴口罩，眼见英国新冠肺炎死亡率愈嚟愈高，他绝望说：「可能过多几个月再听唔到我把声喇！」采访：方骞平

之前乔宝宝应邀参与苏格兰中国文化公益协会搞嘅慈善派口罩活动，「排队嘅九成九系华人，仲以为喺香港派紧口罩，得2个系外国人。呢度全城冇人戴口罩，坚持保持社交距离系最好，但佢哋又唔停口喺度讲嘢，唉！完全冇危险感，真系好易中招。最惨政府冇带头呼吁及强制要戴口罩，家居令又松散，疫情严重嘅西班牙、意大利同美国旅客入境都唔需要任何检疫；以运动为由，24小时出街都得，无喇！𠵱家睇吓好唔好彩，可能同你倾多个几两个月，好快听唔到乔宝宝把声嘞！」

英国成为继美国后，新冠肺炎全球死亡率第二最高国家，乔宝宝灰爆说：「𠵱家出街随身准备，口罩、手套、搓手液，每星期一次去超市买完嘢，返到屋企要马上消毒食物包装，呢度太危险，直情系战场咁，连超市收银、做医生嘅新抱全部都唔戴口罩，我都唔知几时会濑嘢，日日提心吊胆。」不过，他坚持唔会回港避疫：「𠵱家长居苏格兰过住半退休生活，主要睇住个细仔，陪佢喺后花园踩吓单车，因为佢体弱多病不宜外出，希望早日抱孙就会冇咁闷。」