【头条独家】拒认签约换《造星》冠军 Phoebus爆怕女友被攻击玩低调

2020-01-17 00:15

ViuTV《全民造星II》赛果已尘埃落定，由大热Phoebus（吴启洋）夺冠、MC（张天赋）得亚军、Oscar Li（李祉均）季军。虽然Phoebus粉丝唔少，但比赛时获上季冠军姜涛加持，即传有内定之嫌兼早已签约，相反一直是顶头大热的MC因唔肯签约，纵然网上投票排第一，亦只能屈居亚军。对这敏感问题，Phoebus即紧张澄清仲未签约；更自爆为怕女友Jaime，成为攻击对象而低调感情事。撰文：杜淑霞摄影：李维隆服装：IMPERIAL

赛后检讨，三人对自己表现都有不少不满，Phoebus嫌自己唱太多国语歌，未来会多唱广东歌；而唱歌一向唔掂的Oscar话要再恶补，至于一直是顶头大热的MC，认为自己衰在唔够全面，仲话会改坏习惯，「我觉得话我嘅嘢都合理，好似迟到同态度嚣张，系做得唔好，自己会努力改进。」问到MC会否因未签约ViuTV影响赛果，只能屈居亚军，Phoebus和Oscar反应好大连忙否认自己已签约，Phoebus仲抢住答澄清，「其实我哋全部都未签㗎！唔好以为冠军就签咗约，我都未签㗎！（有人话40强已签约？）我系最早畀人话签约嗰个！（唔系点会有姜涛加持啫？！）冇签约呢个事实ViuTV都公开验证咗，我同George（欧镇灏）好早畀人爆内幕话我哋签咗嘛！我就觉得好好笑，我都未知我签约，你又知我签咗。」

唔肯讲拍拖几耐
讲到前景，Phoebus仲唔觉意自爆炸弹，先提起跟女友Jaime在YouTube开频道以《情侣生活分享》为题拍片，「自己本身未玩《全民造星II》前，都有喺YouTube拍片。（女朋友嘛？）系呀！女朋友嚟。（拍咗几耐拖？）呢啲就唔讲啦！（唔畀讲㗎！？）呢个唔系重点嚟。（佢（MC）都认同女朋友拍咗三年！）我都认㗎！（问你拍咗几耐之嘛？）拍咗一段时间。」再三追问，他终认同女友有共识低调处理感情，他更愈说愈激动，「始终两个人嘅事，唔希望咁样，如果𠵱家承认拍咗几耐，突然又散咗咁样，唔系咁好嘅image，我唔系乱讲嘢，只系讲紧啲好认真嘅嘢，只系想喺大众面前低调啲啫！不过我哋𠵱家过得好开心。」他又话绝对唔会后悔同女友拍片放上网，更坦承怕女友成为粉丝攻击对象，「系呀，唔想有呢啲事发生，就低调处理。」Phoebus仲紧张到除衫降温，几可爱！