【头条独家】友谊小姐果然好识Social 陈熙蕊吹水表情好鬼夸

2019-12-09 23:00

陈熙蕊（Blossom），今年26岁，系今届港姐嘅友谊小姐，无印象唔紧要，佢已跟TVB签约，未来应该不时会喺TVB见到佢。日前傍晚6点，家住铜锣湾百德新街嘅陈熙蕊约咗两位今届落选港姐去屋企附近食Cake，吹水讲笑讲足两粒钟，友谊小姐果然好识Social，全程劲多表情，表情仲好鬼浮夸，𠱁到两位朋友好开心。采访:梁志明

陈熙蕊喺比赛中算突出，佢先凭出色口才获得港姐限量珍藏迷你版后冠及权杖，然后再夺得「友谊小姐」名衔。事前曾被睇好入三甲，连上届港冠军陈晓华都睇好佢，话佢好可爱又好有自信，最后得个友谊小姐奖，唔紧要啦，赢到友谊咪仲珍贵，有钱都买唔到呀。

咁多表情会唔会易有纹
当晚六点，陈熙蕊同朋友喺百德新街嘅Lady M食蛋糕，三人选坐室外位，三个女人一坐埋就倾到停唔到，陈熙蕊发言量都好多，仲要系一讲嘢就好兴奋好多动作，有时举手有时会绕住女友人只手，最爆笑系佢啲表情，非常夸张，不时乸埋一旧，堪称弹弓面，好适合做综艺节目。快乐吹水两粒钟，由陈熙蕊请客，走前三人自拍，影一张唔满意再影，离开时三人平排而行继续倾，好多嘢讲。