【头条独家】拍新剧演hehe情 谭俊彦欣赏郭晋安有内涵

一段日子无拍剧的郭晋安在TVB新剧《失忆24小时》中好爆，因为佢会跟谭俊彦（Shaun）发展一段暧昧hehe情，两人演对手戏，行径唔只要乸乸地，连眼神都好有爱。Shaun直言好爱呢个前辈：「我哋系同类人，除咗都有一仔一女，仲坚持演员只要靠努力，唔要靠打关系。如果我真系『同志』，安仔梗系好OK啦，我锺意睇内涵多啲过外表㗎。」采访：方骞平 摄影：李权威


社会气氛唔好，无綫监制王心慰开部喜剧《失忆24小时》等观众睇得开开心心，抹走紧张情绪。10年嚟冇拍过喜剧的Shaun就好有发挥，因为剧情说他对住安仔的情，被误会有hehe成份。日前两人喺观塘和乐邨一间店铺拍外景，剧情讲Shaun以为被安仔出卖，因而去搵搬紧货嘅安仔重组失去记忆，兼找他报复，安仔Hea住打发他走。

谭俊彦原来识搞笑
由于系喜剧，安仔表情都有啲浮夸，而曲发造型的Shaun就好投入演出，阴声细气，手指指，唔觉唔觉竟然用兰花手拨头发，好搞笑。连他都忍唔住话：「好多人睇住我演，评语系话『未见过你咁嘅样喎，原来你系识搞笑嘅。』佢哋慢慢畀到我更多信心，等我可以再放开啲，毕竟之前5部剧都系好严肃，有套喜剧调节吓，轻轻松松都几好，有10几年冇做喜剧，今次搵返当日拍戏团火。」

顺利收工返归凑仔
讲到「好倾慕」的安仔，Shaun就赞不绝口：「佢真系一个好专业嘅演员，因为大家喺屋企都做晒功课，每日都拍得好顺利，会有时间返屋企凑仔凑女。佢系一个最舒服嘅对手，同佢合作唔会有压力，佢同我一样唔喜欢应酬，安仔今日嘅成果全部都系靠努力得返嚟，我好欣赏佢呢样嘢，至于想唔想学似佢咁做埋视帝？呢啲嘢随缘啦。」