【头条独家】前港姐唔买名牌好悭家 唐丽球帮衬商场仔买鞋

唐丽球，绰号「波波」，1984年香港小姐季军，同届冠军系洪金宝老婆高丽虹。参选后翌年同杜德伟拍拖两年，分手后同吴毅将又拍拖十年，03年结婚，同年诞下女儿梓希（Janelle）后退出娱圈专心做家庭主妇，话咁快今年55岁。呢位前港姐唔似其它嫁入豪门嘅港姐成身名牌，平时打扮扑素专帮衬商场仔买鞋。日前下昼就见到波波同女友人又去铜锣湾金百利睇平价鞋，睇睇吓见墙上挂住块镜仲忍唔住照咗一阵。采访:梁志明

波波系慧妍雅集成员，经常参与慈善活动，有善心之馀仲非常敢言，例子有旧年落选港姐工藤佑采在落选后伴舞时黑面，唐丽球就力撑对方：「畀我都会，人之常情，呢啲系真我个性，好难得。我好欣赏佢，唔觉有问题，人系有情绪。」

商场仔熟客
当日，波波同女友人去咗金百利商场睇鞋，其实之前已经影过波波去呢间商场仔行街，亦同样去咗嗰间鞋铺睇鞋。不过观乎波波主力畀意见，佢应该系介绍朋友买鞋，见佢乜鞋都睇，对250蚊一对嘅平底鞋好有兴趣，最后朋友睇唔啱，喺商场行咗一阵就走人。两人行去的士站等的士，等等吓见到波波行去帮架的士闩门，原来有老人家上咗的士后无闩门，心地好嘅波波就主动帮忙嘞，心善人自然靓，明白点解5字头嘅波波Keep得咁靓。