【阿碌开咪】没口德的卖鱼佬

限聚令下，一日三餐皆冇得到食肆坐低慢慢叹，大大将小弟优悠生活习惯打乱。不过，人，总要适应新环境，怨天怨地冇用嘅，最多窒下啲高官「人头猪脑」，竟然觉得赶晒十万计打工仔踎街边食，会更「防毒」，真真荒天下之大谬，收几百万元年薪，竟可谂嘢咁冇逻辑，若在私人机构？怕者屁股早畀老板踢到开花！

高官有司机，有冷气私人办公室，有秘书帮手叫外卖，当然百分百冇问题啦。如今搞到咁大民怨，点收科？

有！我建议由林郑开始，带埋张建宗、陈茂波、郑若骅及陈肇始等成棚高官，在摄氏三十几度烈日或大雨照头淋情况下，陪打工仔踎街开餐，咁呢，大家条气可能会顺少少，否则，唔日日夜夜咒瓜你班友就奇！

小弟最新的日常行程，基于冇得夹叠报章到茶记叹早餐，又要不时戴着口罩，于是改早上六点，趁天气清凉又冇乜途人，先急步行斜路作运动。然后再买几份报章及鲜奶、面包回家，入房关门，幻想独自坐在茶记，照叹。

傍晚，则一丁友走落土瓜湾街市买海鲜回家，畀菲佣姐姐莎莉蒸，再开瓶白酒慢慢欣赏其鲜味。

讲起到土瓜湾街市买餸，有件事不吐不快。正是上周政府街市之内，有鱼档员工确诊，立时令到不少区内街坊弹开，唔敢再入，宁愿到附近街边菜档鱼档肉档买餸。

咁搞法，室内街市所有摊贩，当然流失大量生意，叫苦连天。

本来市政署已即时再三大消毒、大清洗，做足一切补救措施，但消费者信心，总是要慢慢才能恢复的。但此时有个冇口德的摊贩，竟然趁同行病，攞同行命。正是街边其中一档的卖鱼佬，不停讲：「街市里面有毒呀，买鱼，喺呢度安全好多呀，若你入去买，分分钟领嘢㗎！」

小弟听在耳里，但觉非常讨厌。喂！使唔使在同行遭逢不幸时，落井下石，大力踩多一脚呀？呢个冇口德的卖鱼佬有乜报应，唔知，只知佢呢世都冇咗我呢个客啫！

曾智华

阿碌开咪