星岛日报

【阿碌开咪】特朗普心虚脚软

2020-08-03 11:00
哗,真真从来未见过美国总统可以咁核突。特朗普摆明心虚脚软,知道近月民望急泻,连任机会愈来愈微,故此,结合一众白宫幕僚,尤其国务卿蓬佩奥,狂攻中国,将其「妖魔化」,希望以制造一致外敌挽回国内下滑民望。 

有冇效果?有多少。但观乎美国传媒(除咗霍士新闻),差不多冇一个绝对支持特朗普,反之,个个Talk Show节目主持人都以玩残佢为乐。呢种软性「抹黑」,比正统新闻更具威力,更深入民心。

当民意一日一日低落,而日子一日一日逼近十一月三日大选,发梦都想连任的特朗普,当然心虚脚软。呢种心态下,极易阵脚失衡,胡乱出招,不理好丑,但求就手。

上周佢突然抛出声称邮寄投票有利选举舞弊,意图将大选延迟。贴文在Twitter一出,真真大件事!美国强调百分百言论自由,兼且敌对民主党步步睇住嚟砌。结果,惨咯,呢下打乱章,有美国人Buy就奇,死到贴地,不但民主党一齐反对,新闻界更当然唔放过,力指狂特想打蟊波。最最最大镬,是连自己友共和党参议院领袖麦康奈尔及众议院领袖麦卡锡也表明反对,真系乜面都冇晒矣。

明显狂特呢铺完全冇先做党内谘询,只一己之见,就擒擒青发帖。结果灰头土脸外,民望势更进一步下挫,太核突矣。

肯定今次延迟大选提议,乃爆肚之作。若佢之前睇睇美国宪法,必定缩,因写得清清楚楚,只有国会及参众两院才有权更改总统大选日期,这个权并非在总统手上。

唔使太认识美国政治,都应知今届众议院由民主党控制。议长佩洛茜,乃特朗普「仇人」,大家都希望对方在政治上「粉身碎骨」,如此深仇大恨,任何有利狂特的议案,根本唔使慌佩洛茜会畀佢顺利通过, 反之,铺铺鈎脚就一定会。

总结,特朗普如今已方寸大乱,中国面对佢狂攻,一定要沉住气忍忍忍,因一还手,等于替佢「助选」!

曾智华

最新回应

關鍵字

热门文章