為買樓儲老婆本開餐廳 胡子彤孖女友歐鎧淳撐檯腳做生招牌

胡子彤繼兩年前因電影《點五步》由棒球員變演員身分後，今年他決定涉獵埋飲食界，伙拍哥哥及已故化妝大師陳文輝的孫兒Gary Chan，榮升做鐵板燒店的老闆，更在新春期間開幕，一家人與女朋友歐鎧淳，及圈中好友吳肇軒、談善言、柯煒林、陳宇琛等也現身支持。

問為何會有投資開餐廳？子彤說：「其實我同好多90後一樣，不懂理財，但也有想買樓上車、畀家用、儲老婆本的需要；今次有份一齊投資的拍檔，是去年拍電影《明日戰記》時認識的特技化妝師，佢同我講了很多投資、未來的事情，大家覺得好啱傾，當佢打算開這間鐵板燒時又真係預埋我……我心目中的諗法係，與其有錢時我又會亂使，不如當投資機會！」

子彤自言喜歡吃，平時同班朋友都鍾意食肉、燒烤類和飲酒。他說：「雖然我未必可以投放到好多時在餐廳幫忙，但我會不斷推介畀朋友，叫大家約食嚟呢度！」榮升做餐廳老闆，會否經常帶女朋友來撐檯腳？子彤笑言：「都會㗎！生日、情人節、乜乜紀念日都係喺度食，我諗女朋友唔介意嘅！哈哈，講笑啫！好似今年情人節，除咗食飯，我都送咗份親手整嘅禮物畀佢，好在女朋友都表示滿意！」